বিশেষ বাৰ্তা, ২৬ জুলাইঃ অসমৰ লোক-সংস্কৃতি জগতৰ বৰেণ্য ব্যক্তিসত্তা উমাকান্ত বৈৰাগীৰ আজি পুৱা পৰলোকপ্ৰাপ্তি ঘটে। তেওঁৰ মৃত্যুৱে ৰাজ্যবাসীক মৰ্মাহত কৰি তুলিছে। অসমৰ বৰ্ণিল কলা-সংস্কৃতিৰ অভিন্ন অংগ টোকাৰী গীতৰ ভঁৰাল চহকী কৰি অনবদ্য সৃষ্টিৰাজিৰে সহস্ৰজনক মোহাচ্ছন্ন কৰা বৈৰাগীৰ দেহাৱসান ৰাজ্যবাসীৰ বাবে অপূৰণীয় ক্ষতি। নিৰলস প্ৰচেষ্টাৰে অসমৰ লোক-সংস্কৃতিৰ পথাৰখন জীপাল কৰি যোৱা বিশিষ্ট শিল্পী উমাকান্ত বৈৰাগীৰ প্ৰয়াণত মুখ্যমন্ত্ৰী ড০ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱালে গভীৰ শোক প্ৰকাশ কৰিছে।