নিয়মীয়া বার্তা, ২৬ জুনঃ গুৱাহাটীত ভয়াৱহ ৰূপত ক’ভিড–১৯ত আক্রান্ত লোকৰ সংখ্যা বৃদ্ধি পাইছে৷ ৰাজধানী চহৰখনত ক’ৰোনা ভাইৰাছৰ সামাজিক সংক্রমণ ৰোধৰ বাবে তৎপৰ হৈ পৰিছে কামৰূপ মহানগৰ জিলা প্রশাসন৷ গুৱাহাটী মহানগৰীৰ ১১টা ৱার্ডত ১৪ দিনৰ বাবে সম্পূর্ণ লকডাউন ঘোষণা কৰাৰ পাছত কালি জিলা প্রশাসনে বেলতলা সাপ্তাহিক বজাৰ অনির্দিষ্টকালৰ বাবে বন্ধ ঘোষণা কৰে৷
ক’ৰোনা ভাইৰাছৰ ভয়াৱহতাৰ প্রতি লক্ষ্য ৰাখি জিলা প্রশাসনে এই নির্দেশ জাৰি কৰে৷ লক্ষণীয় যে লকডাউনৰ শিথিলতাৰ সুযোগ লৈ মহানগৰীৰ বিভিন্ন বজাৰত যথেষ্ট জনসমাগম বৃদ্ধি পাইছে৷ একাংশ লোকে চৰকাৰী নীতি–নির্দেশনা উলংঘাৰে সামাজিক দূৰত্ব বজাই নাৰাখি বজাৰসমূহত ভিৰ কৰা পৰিলক্ষিত হৈছে৷
শেহতীয়াকৈ বেলতলাৰ সাপ্তাহিক বজাৰত সামাজিক দূৰত্ব বজাই নাৰাখি হোৱা জনসমাগমে ক’ৰোনাৰ সামাজিক সংক্রমণ বৃদ্ধি কৰাৰ আশংকা কৰি জিলা প্রশাসনে বেলতলা বজাৰ বন্ধ ৰখাৰ নির্দেশ জাৰি কৰে৷ পৰৱর্তী নির্দেশ জাৰি নকৰা পর্যন্ত বেলতলা সাপ্তাহিক বজাৰ বন্ধ থাকিব৷ লগতে প্রয়োজন সাপেক্ষে মহানগৰীৰ আন কেইবাটাও স্থানত থকা দৈনিক আৰু সাপ্তাহিক বজাৰকেইখনো বন্ধ ৰখাৰ বাবে প্রশাসনে যাৱতীয় ব্যৱস্থা গ্রহণ কৰিব বুলি জানিবলৈ দিছে৷