নৱপ্রজন্মৰ মাজত ধূমপান নিষিদ্ধৰ আইন প্ৰণয়ন এইখন দেশত

মালদ্বীপত ২০০৭ চনৰ ১ জানুৱাৰী বা তাৰ পিছত জন্মগ্রহণ কৰা যুৱক–যুৱতীক ধঁপাত সেৱন–ক্রয়–বিক্রয় কৰাত নিষেধাজ্ঞা আৰোপ কৰা হৈছে৷ আইন প্রণয়নেৰে এনে নিষেধাজ্ঞা আৰোপ কৰা বিশ্বৰ একমাত্র দেশ হিচাপে পৰিগণিত হ’ল মালদ্বীপ৷

দ্বীপৰাষ্ট্রখনৰ স্বাস্থ্য মন্ত্রালয়ে শেহতীয়াভাৱে ঘোষণা কৰে যে দেশখনৰ ভিতৰত নৱপ্রজন্মই ধঁপাত সেৱন, ক্রয় বা বিক্রী কৰাটো অপৰাধ হিচাপে গণ্য কৰা হ’ব৷ ধঁপাত সেৱনৰ ফলত হোৱা ক্ষতিৰ পৰা যুৱক–যুৱতীসকলক্ ৰক্ষা কৰাৰ বাবে চৰকাৰে দৃঢ় সংকল্প গ্রহণ কৰিছে৷

স্বাস্থ্য মন্ত্রালয়ৰ সূত্রই লগতে সদৰী কৰে যে এই নিষেধাজ্ঞা সকলোধৰণৰ মাদক দ্রব্যৰ ক্ষেত্রত প্রযোজ্য হ’ব আৰু খুচুৰা বিক্রেতাসকলে বিক্রীৰ পূর্বে বয়স পৰীক্ষা কৰিব লাগিব৷ বিশ্ব স্বাস্থ্য সংস্থাই মালদ্বীপৰ এই পদক্ষেপৰ শলাগ লৈছে৷

উল্লেখ্য যে মালদ্বীপ চৰকাৰে ২০০৪ চনৰ শেষৰফালে দেশখনত ভেপিং (ইলেক্ট্রনিক চিগাৰেট) আমদানি, ব্যৱহাৰ আৰু বিতৰণত নিষেধাজ্ঞা আৰোপ কৰিছিল৷ এইবাৰ ধূমপানৰ ক্ষেত্রত এই পদক্ষেপ লোৱা হৈছে৷

অৱশ্যে ইয়াৰ পূর্বেও ধূমপান নিষিদ্ধ কৰাৰ পৰিকল্পনা কৰিছিল যদিও কার্যকৰী হোৱা নাছিল৷ ২০০২ চনত নিউজীলেণ্ড, আমেৰিকাকে ধৰি কেইখনমান ৰাষ্ট্রত ধূমপান নিষিদ্ধ আইনৰ প্রসংগ উত্থাপন হৈছিল যদিও কার্যকৰী নহ’ল৷

বিশ্ব স্বাস্থ্য সংস্থাৰ সূত্র অনুসৰি, প্রতিবছৰে বিশ্বত ধূমপানৰ বাবেই ৭০ লক্ষাধিক লোকৰ মৃত্যু হয়৷ মালদ্বীপত ২৫.৫ শতাংশ লোকে ধূমপান কৰে৷ এই লোকসকলৰ বয়স ১৫ৰ পৰা ৬৯ বছৰৰ ভিতৰত৷

ডিজিটেল ডেস্ক, ৫ নৱেম্বৰ