উত্তৰ প্ৰদেশৰ বাৰাণসীত গংগা নদীত ইফতাৰ পাৰ্টি অনুষ্ঠিত কৰাৰ অভিযোগত ১৪গৰাকী মুছলমান যুৱকক গ্ৰেপ্তাৰ কৰিছে আৰক্ষীয়ে।
মঙলবাৰে পঞ্চগংগা ঘাটৰ সমীপত নাৱত ইফতাৰ পাৰ্টি আয়োজনৰ সময়ত চিকেন বিৰিয়ানী খোৱাৰ পিছত বাকী খাদ্য গংগা নদীত পেলোৱাৰ অভিযোগত ২০ বছৰীয়া ১৪গৰাকী স্থানীয় যুৱকক আৰক্ষীয়ে চিনাক্ত কৰি জিম্মাত লৈছে।
বাৰাণসীৰ সহকাৰী আৰক্ষী আয়ুক্তই কয় যে সামাজিক মাধ্যমত ভাইৰেল হোৱা ভিডিঅ’ৰ আধাৰত এই ব্যৱস্থা গ্ৰহণ কৰা হৈছে। ভিডিঅ’ত দেখা গৈছিল যে, যুৱকসকলে ইফতাৰ পাৰ্টিৰ পাছত বাকী থকা বিৰিয়ানী নদীত পেলাই দিছে।
এই ঘটনাৰ পাছত ভাৰতীয় জনতা যুব মৰ্চাৰ এগৰাকী নেতাই কোটোৱালি থানাত লিখিত অভিযোগ দাখিল কৰে। সামাজিক মাধ্যমত ভিডিঅ’ ভাইৰেল হোৱাৰ ২৪ ঘণ্টাৰ ভিতৰত আৰক্ষীয়ে ব্যৱস্থা গ্ৰহণ কৰিছে।
আৰক্ষীয়ে জনাইছে যে যুৱকসকলৰ বিৰুদ্ধে ধৰ্মীয় অনুভূতিত আঘাত কৰাৰ গোচৰ ৰুজু কৰা হৈছে আৰু তদন্ত চলি আছে।
ডিজিটেল ডেস্ক, ১৮ মাৰ্চ