নিয়মীয়া বাৰ্তা ৩১ মাৰ্চঃ আমেৰিকাৰ নিউয়র্ক প্রদেশৰ গৱর্নৰ এন্ড্রিউ কুম’ৰ বিৰুদ্ধে পুনৰ এগৰাকী মহিলাই যৌন আতিশয্য চলোৱাৰ অভিযোগ আনিছে৷ শ্বেৰী হিল নামৰ ৫৫ বছৰীয়া মহিলাগৰাকীয়ে কালি অভিযোগ কৰা অনুসৰি বানাক্রান্ত এক অঞ্চল পৰিদর্শনৰ সময়ত মহিলাগৰাকীক যৌন আতিশয্য চলাইছিল কুম’ৱে৷ শ্বেৰী হিলে জুম নিউজৰে হোৱা এক বার্তালাপত এই কথা উল্লেখ কৰিছে৷
উল্লেখনীয় যে অনুষ্ঠানটোত উপস্থিত আছিল এট’নী গ্ল’ৰিয়া আলৰেট৷ ২০১৭ চনত ৰ’ছেষ্টাৰ অঞ্চলৰ এক বাসগৃহত মহিলাগৰাকীৰ ওপৰত যৌন আতিশয্য সংঘটিত হৈছিল৷ উল্লেখনীয় যে এতিয়ালৈকে চাৰিগৰাকী মহিলাই কুম’ৰ বিৰুদ্ধে যৌন আতিশয্য চলোৱাৰ অভিযোগ আনিছে৷ এই অভিযোগক কেন্দ্র কৰিয়েই গৱর্নৰগৰাকীৰ বিৰুদ্ধে নিউয়র্কবাসীৰ মাজত ক্ষোভৰ উদ্গীৰণ ঘটিছে৷ আনকি বিভিন্ন মহলে গৱর্নৰ কুম’ৰ পদত্যাগো দাবী কৰিছে৷ অৱশ্যে ৰাষ্ট্রপতি জ’ বাইডেন এতিয়াও ডেম’ক্রেট গৱর্নৰ কুম’ৰ প্রতি বে’চ নৰম বুলি সংবাদ মাধ্যমত চলিছে সমালোচনা৷