নিয়মীয়া বাৰ্তা, ২৬ জানুৱাৰীঃ কানাড়া ছবি জগতৰ জনপ্রিয় অভিনেত্রী জয়শ্রী ৰামায়াৰ মৃতদেহ বাংগালুৰুস্থিত এটা পুৰণি পুনৰসংস্থাপন বা পুনর্বাস কেন্দ্রত উদ্ধাৰ হোৱা ঘটনাক লৈ সৃষ্টি হৈছে চাঞ্চল্য৷ জনপ্রিয় অভিনেত্রী গৰাকীৰ মৃত্যুৰ কাৰণ এতিয়াও জানিব পৰা হোৱা নাই৷
উল্লেখনীয় যে এসময়ত কানাড়া বিগ বছ ছিজন–৩ৰ অংশগ্রহণকাৰীও আছিল অভিনেত্রী ৰামায়া৷ অভিনেত্রীগৰাকীৰ অস্বাভাৱিক মৃত্যুৱে কানাড়া ছবি উদ্যোগত শোকৰ ছাঁ পেলাইছে৷ দক্ষিণৰ ৰাজ্য কর্ণাটকত অভিনেত্রীগৰাকীৰ বিয়োগৰ লগে লগে অনুৰাগীসকলে গভীৰ শোক প্রকাশ কৰিছে৷ সংবাদ মাধ্যমত প্রকাশ পোৱা প্রতিবেদন অনুসৰি দীর্ঘদিন ধৰি হতাশাত ভুগি আছিল অভিনেত্রী ৰামায়াই৷ ইয়াৰ বাবে চিকিৎসাও গ্রহণ কৰিছিল অভিনেত্রীগৰাকীয়ে৷ ২০২০ চনৰ জুলাই মাহত ছ’চিয়েল মিডিয়া ফেচবুকযোগে আত্মহত্যাৰ বাবে নিজে আগবঢ়া বুলি এক পোষ্ট দি অনুৰাগীসকলৰ মাজত সৃষ্টি কৰিছিল শংকা৷
ইয়াৰ পিছতে কানাড়া ছবি উদ্যোগৰ বহু কলা–কুশলীয়ে অভিনেত্রী ৰামায়াক চিকিৎসকৰ পৰামর্শ গ্রহণ কৰিবলৈ আহ্বান জনাইছিল৷ অৱশ্যে অনুৰাগীৰ মাজত প্রতিক্রিয়াৰ লগে লগে ফেচবুকৰ পোষ্ট বিলুপ্ত কৰিছিল ৰামায়াই৷