নিয়মীয়া বাৰ্তা, ২৬ জানুৱাৰীঃ আমেৰিকাত পূর্বৰ ৰাষ্ট্রপতিসকলে দায়িত্ব সামৰি হোৱাইট হাউছৰ পৰা বিদায় লোৱাৰ পিছত দেশবাসীৰ প্রশংসা লাভ কৰিবলৈ সক্ষম হৈছিল৷ বাৰাক অ’বামাই দুটা কার্যকালৰ পিছত হোৱাইট হাউছ এৰাৰ লগে লগে আমেৰিকাত অতি জনপ্রিয় নেতা হিচাপে পৰিচিত হৈছিল৷ অ’বামালৈ শুভেচ্ছা আৰু অভিনন্দন আহিছিল বিশ্ব নেতৃত্বৰ পৰা৷ কিন্তু ড’নাল্ড ট্রাম্পে ৰাষ্ট্রপতিৰ কার্যকালৰ অন্ত পেলাই হোৱাইট হাউছৰ পৰা বিদায় লোৱাৰ লগে লগে ট্রাম্পক বিভিন্ন মহলে সমালোচনা কৰিছে৷
আনকি ট্রাম্পে যাতে দ্বিতীয় কার্যকালৰ বাবে ৰাষ্ট্রপতি নির্বাচনত প্রতিদ্বন্দ্বিতা কৰিব নোৱাৰে, তাৰ প্রতি লক্ষ্য ৰাখি ছিনেটত মহাভিযোগ প্রক্রিয়া আৰম্ভ কৰিছে ডেম’ক্রেটিক নেতাসকলে৷ শেহতীয়াকৈ ট্রাম্পে ফ্ল’ৰিডাস্থিত মাৰ–এ–লাগ’ প্রাসাদত বসবাস কৰিবলৈ লৈছে৷ কিন্তু ট্রাম্পে মাৰ–এ–লাগ’ত প্রৱেশ কৰাৰ লগে লগে আকাশত এখন বিমানৰ পাছফালে দেখা গ’ল এক বেনাৰ৷
য’ত লিখা আছে ‘ট্রাম্প ৱর্ষ্ট প্রেছিডেণ্ট এভাৰ’৷ অর্থাৎ আমেৰিকাত আটাইতকৈ নিকৃষ্ট ৰাষ্ট্রপতি হিচাপে আখ্যা দিয়া হৈছে ট্রাম্পক৷ ছ’চিয়েল মিডিয়া টুইটাৰত এই বেনাৰ লগে লগে মুকলি হোৱাৰ পিছতেই সংবাদ পত্রসমূহত ব্যাপক চর্চা চলিছে৷