আজি মিজোৰামৰ চিহমুইস্থিত ছুয়াকা ক্ৰিকেট গ্ৰাউণ্ডত চৰকাৰী টুৰ্ণামেণ্ট চলি থকাৰ সময়তে মিজোৰামৰ ক্ৰিকেটাৰ কে. লালৰেমৰুয়াটাৰ মৃত্যু হোৱাৰ খবৰে সমগ্ৰ ক্ৰিকেট মহলত শোকৰ ছাঁ পেলাইছে।
৩৮ বছৰীয়া খাৱলহ্ৰিং লালৰেমৰুয়াটা ক্ৰিকেট এছ’চিয়েচন অৱ মিজোৰাম (CAM)ৰ উদ্যোগত অনুষ্ঠিত খালেদ মেম’ৰিয়েল দ্বিতীয় বিভাগ স্ক্ৰিনিং টুৰ্ণামেণ্টত অংশ লৈ আছিল। তেওঁ ভিআৰচিচি (VRCC) দলৰ হৈ বেটছমেন হিচাপে চাউনপুই ILMOV ক্ৰিকেট ক্লাবৰ বিৰুদ্ধে খেলি আছিল। খেল চলি থকাৰ সময়তে তেওঁ মাটিত ঢলি পৰে।
প্ৰত্যক্ষদৰ্শীৰ মতে, বেটিং শেষ কৰাৰ কিছু সময়ৰ পাছতেই লালৰেমৰুয়াটাই বুকুত তীব্ৰ অসুবিধা অনুভৱ কৰাৰ কথা কয়। তাৰ কিছু মুহূৰ্তৰ ভিতৰতে তেওঁ হঠাৎ অচেতন হৈ মাটিত পৰি যায়। খেলুৱৈ, বিষয়ববীয়া আৰু দৰ্শকৰ মাজত তৎক্ষণাৎ আতংকৰ সৃষ্টি হয়। তেওঁক ততাতৈয়াকৈ চিকিৎসাৰ বাবে লৈ যোৱা হৈছিল যদিও সকলো চেষ্টা বিফল হয় আৰু তেওঁক বচাব পৰা নগ’ল। মৃত্যুৰ সঠিক কাৰণ এতিয়ালৈকে আনুষ্ঠানিকভাৱে নিশ্চিত হোৱা নাই যদিও ষ্ট্ৰোক হোৱাৰ সম্ভাৱনা সন্দেহ কৰা হৈছে।
১৯৮৭ চনৰ ৯ মাৰ্চত জন্মগ্ৰহণ কৰা খাৱলহ্ৰিং লালৰেমৰুয়াটা মিজোৰাম ক্ৰিকেট জগতৰ এক পৰিচিত আৰু সন্মানিত মুখ আছিল। তেওঁ ২০১৮–১৯ ৰঞ্জি ট্ৰফীত ২০ ডিচেম্বৰ ২০১৮ তাৰিখে মিজোৰামৰ হৈ প্ৰথম শ্ৰেণীৰ ক্ৰিকেটত আত্মপ্ৰকাশ কৰে। পৰৱৰ্তী সময়ত তেওঁ ২০১৮–১৯ ছৈয়দ মুস্তাক আলী ট্ৰফীত অংশ লৈ ২১ ফেব্ৰুৱাৰী ২০১৯ তাৰিখে নিজৰ টি-২০ অভিষেক কৰে। দীৰ্ঘদিন ধৰি তেওঁ নিজৰ নিষ্ঠা, শৃংখলা আৰু খেলৰ প্ৰতি গভীৰ অনুৰাগৰ বাবে সমাদৃত হৈ আহিছিল আৰু স্থানীয় ক্ৰিকেট পৰিসৰত এক সন্মানজনক উপস্থিতি আছিল।
তেওঁৰ আকস্মিক মৃত্যুৱে মিজোৰাম ক্ৰিকেট সমাজক গভীৰ শোকত নিমজ্জিত কৰিছে। খেলুৱৈ, বিষয়ববীয়া আৰু ক্ৰিকেট এছ’চিয়েচন অৱ মিজোৰামে তেওঁৰ পৰিয়াললৈ গভীৰ সমবেদনা জ্ঞাপন কৰিছে। এগৰাকী নিষ্ঠাৱান ক্ৰিকেটাৰ হিচাপে স্মৰণ কৰি সকলোৱে কয় যে তেওঁৰ অকাল বিয়োগে ৰাজ্যখনৰ ক্ৰিকেট সমাজত এক অপূৰণীয় শূন্যতা সৃষ্টি কৰিছে।
ডিজিটেল ডেস্ক, ৮ জানুৱাৰী