অসম বাৰ্তাজীৱী সংঘৰ লিডুৰ ৪৫ সংখ্যক দ্বি-বাৰ্ষিক অধিবেশনৰ ব্যাপক প্ৰস্তুতি, লিডুত লাইখুঁটা স্থাপন
নিয়মীয়া বাৰ্তা, ৩০ ডিচেম্বৰঃ ৰাজ্যৰ সাংবাদিকসকলৰ অন্যতম শক্তিশালী মঞ্চ অসম বাৰ্তাজীৱী সংঘৰ ৪৫ সংখ্যক দ্বি-বাৰ্ষিক অধিবেশন এইবেলি উজনিৰ লিডুত অনুষ্ঠিত হ’ব। ২৫ লক্ষাধিক টকা বাজেটেৰে মাৰ্ঘেৰিটাৰ লিডু বাজাৰ হাইস্কুল খেলপথাৰত ২১, ২২, ২৩ আৰু ২৪ জানুৱাৰীত অনুষ্ঠিত হ’ব। আজি আনুষ্ঠানিক ভাৱে লাইখুটা স্থাপন কৰে আদৰণি সমিতিৰ সভাপতি তথা বিধায়ক ভাস্কৰ শৰ্মাই। আদৰণি সমিতিৰ সভাপতি শৰ্মাক অনুষ্ঠানস্থলীলৈ গায়ন-বায়নেৰে আদৰণি অনা হয়। তাৰ পিছতেই মাঙ্গলিক প্ৰক্ৰিয়াৰে লাইখুটা স্থাপন কৰা হয়। আদৰণি সমিতিৰ মুখ্য সাধাৰণ সম্পাদক ৰাণাজ্যোতি নেওগে আতঁধৰা অনুষ্ঠানত অসম বাৰ্তাজীৱী সংঘৰ উপ-সভাপতি কমল তালুকদাৰ, তিনিচুকীয়া জিলা সাংবাদিক সন্থাৰ সভাপতি অনুজ কলিতা, প্ৰাক্তন সভাপতি ড০ ঋষি দাস, জ্যেষ্ঠ সাংবাদিক জগত চাংমাই মাৰ্ঘেৰিটা সাংবাদিক সংস্থাৰ সভাপতি ৰামপ্ৰসাদ আম্বেদকাৰ, ডিগবৈ প্ৰেছ ক্লাবৰ সভাপতি ৰাজু হাজৰিকা আদিয়ে অতিথি ৰূপে অংশগ্ৰহণ কৰে। অধিবেশন উপলক্ষে দ্বিতীয় দিনাৰ প্ৰথম মুকলি সভাত মুখ্য অতিথি ৰূপে সাহিত্য অকাডেমী বঁটা বিজয়ী সাহিত্যিক তথা সাদিনৰ সম্পাদক অনুৰাধা শৰ্মা পূজাৰী মুখ্য অতিথি, প্ৰশান্ত ৰাজগুৰু উদ্বোধক ৰূপে আৰু জাতীয় তথা জনগোষ্ঠীয় সংগঠনৰ নেতৃবৃন্দ বিশিষ্ট অতিথি ৰূপে অংশগ্ৰহণ কৰিব। ২৩ জানুৱাৰীৰ মুকলি সভাত মুখ্য অতিথি ৰূপে ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মা অংশগ্ৰহণ কৰাৰ কথা।