নিয়মীয়া বাৰ্তা, ১১ অক্টোবৰঃ তেজপুৰৰ মধ্যপাৰা নিবাসী তথা চেক্ৰেড হাৰ্ট স্কুলৰ সপ্তম শ্ৰেণীৰ ছাত্ৰ আয়ন কুণ্ডুৰ হাতৰ পৰশত গঢ় লৈ উঠিছে দেৱী দুৰ্গাৰ অনন্য সুন্দৰ প্ৰতিমা৷ ১২বছৰীয়া আয়নে পঞ্চম শ্ৰেণীত পঢ়ি থকা সময়ত প্ৰথমবাৰলৈ দুৰ্গা প্ৰতিমা নিৰ্মানৰ বাবে আগ্ৰহ প্ৰকাশ কৰে৷
পুত্ৰৰ এই আগ্ৰহৰ বাবে পিতৃ মাতৃয়ে সহাৰি জনো্ৱাত স্বতঃস্ফূৰ্ত ভাবেই আয়নে গঢ়ি তোলে দেবী দুৰ্গাৰ মৃন্ময় প্ৰতিমা৷ এজন সুনিপুন খনিকৰৰ দৰেই দশভূজাৰ লগতে গণেশ, সৰস্বতী, কাৰ্তিক, লক্ষ্মী, সিংহ, ময়ুৰ, ৰাজহংস আদিৰ মৃন্ময় প্ৰতিমা গঢ় দিয়া আয়নে যোৱা ১৫আগষ্টৰ পৰা এইবাৰ প্ৰতিমা নিৰ্মাণৰ কাম আৰম্ভ কৰে৷ দুদিন পূৰ্বে এই মুৰ্তিত ৰং সনা কাম সমাপ্ত কৰি শনিবাৰে বস্ত্ৰ পৰিধান কৰাই প্ৰতিমাত৷ এতিয়া এই প্ৰতিমাৰেই কিশোৰজনে নিজা বাসগৃহতে কৰিব দুৰ্গা পূজা৷
উল্লেখ্য যে, অঞ্চলটোৰ কিশোৰ কিশোৰী সকলে মিলি সপ্তমীত মহিষাসুৰমৰ্দিনীৰ প্ৰতিমা বেদীত স্থাপন কৰি আয়নে আৰম্ভ কৰিব দুৰ্গতিনাশিনীৰ শাৰদীয় পূজা৷
Input: সমীৰ কৰ, তেজপুৰ