নিয়মীয়া বাৰ্তা ,৩০ জুলাই: নিচাজাতীয় সামগ্ৰীৰ ৰম্যভূমিত পৰিণত হোৱা নাগালেণ্ড সীমান্তৱৰ্তী মেৰাপানীত আজি পুনৰ জব্দ হৈছে নিষিদ্ধ ড্ৰাগছ। আজি বিয়লি মেৰাপানী সীমান্তত নিয়োজিত নিৰপেক্ষ বাহিনী ১৪২ নং চিআৰপিএফে চলোৱা নিয়মীয়া তালাচীত ব্ৰাউন চুগাৰসহ আটক কৰিছে নাগালেণ্ডৰ এটা সৰবৰাহকাৰীক। সৰবৰাহকাৰীটোৱে এটা ধপাতৰ টেমাত ভৰাই থোৱা অৱস্থাত ব্ৰাউন চুগাৰখিনিৰ লগতে ড্ৰাগছৰূপে ব্যৱহৃত দুটা টেবলেট মেৰাপানীৰ দিশৰ পৰা নাগালেণ্ডৰ দিশে নিয়াৰ চেষ্টা চলাইছিল। আটকাধীন ড্ৰাগছ সৰবৰাহকাৰীটো নাগালেণ্ডৰ ৱখা জিলাৰ ভাণ্ডাৰী মহকুমাৰ ফুটহিল এলেকাৰ নিলট’ চুমি বুলি চিনাক্ত কৰা গৈছে। ১৪২ নং চিআৰপিএফে জব্দকৃত ড্ৰাগছসহ সৰবৰাহকাৰীটোক আৰক্ষীক গতাই দিয়ে। উল্লেখ্য যে, শেহতীয়াকৈ মেৰাপানী সীমান্তত ব্যাপকৰূপে বৃদ্ধি পাবলৈ ধৰিছে ড্ৰাগছৰ প্ৰচলন।