নিয়মীয়া বাৰ্তা, ১১ মাৰ্চঃ হোলীৰ আনন্দৰ মাজতে বৰপেটাত অঘটন। হোলী খেলি গা ধুবলৈ গৈ সলিলসমাধি ঘটিল ৩ কিশোৰীৰ। পুখুৰীত গা ধুবলৈ গৈ মৃত্যুক সাবতিলে কিশোৰী কেইগৰাকীয়ে। মৃত কিশোৰী কেইগৰাকী মধুস্মিতা দাস, ঋতুস্মিতা নাথ আৰু প্ৰীতিৰেখা নাথ। ঋতুস্মিতা আৰু প্ৰীতিৰেখা দুয়ো ভগ্নী আৰু মধুস্মিতা সম্পৰ্কীয় আত্মীয়ৰ ভগ্নী বুলি জানিব পৰা গৈছে।
বৰপেটাৰ যতিগাঁৱত সংঘটিত হৈছে এই কৰুণ ঘটনা। হোলী খেলি নিজ ঘৰৰ পিছফালে থকা পুখুৰীত গা ধুবলৈ গৈছিল কিশোৰীকেইগৰাকী। ভালকৈ সাঁতুৰিব নজনা তিনিও ভগ্নীয়ে পানীত ককবকাই থকা প্ৰত্যক্ষ কৰিছিল এজন যুৱকে কিন্তু পানীৰ পৰা বচাবলৈ সক্ষম নহ’ল যুৱকজন। ইতিমধ্যে স্থানীয় ৰাইজে উদ্ধাৰ কৰি বৰপেটা চিকিৎসা মহাবিদ্যালয়লৈ প্ৰেৰণ কৰে যদিও চিকিৎসকে মৃত ঘোষণা কৰে। এই খবৰ বিয়পি পৰাৰ লগে লগে শোকাকুল হৈ পৰিছে সমগ্ৰ অঞ্চল।