নিয়মীয়া বাৰ্তা ২৯ ছেপ্টেম্বৰঃ মুখ্যমন্ত্রী ড০ হিমন্ত বিশ্ব শর্মাৰ শান্তি প্রক্রিয়াৰ প্রতি সঁহাৰি জনাই মূলসুঁতিলৈ উভতি আহিল দুর্ধর্ষ মাওবাদী নেতা টিংৰাজ ওৰাং৷ মঙলবাৰে অসম আৰক্ষীৰ অতিৰিক্ত সঞ্চালকপ্রধান হীৰেন নাথৰ ওচৰত আত্মসমর্পণ কৰি টিংৰাজ ওৰাঙে ভাৰতীয় সংবিধানৰ প্রতি আস্থা আৰু বিশ্বাস প্রকাশ কৰে৷
উল্লেখ্য যে দীর্ঘসময় ধৰি মাওবাদী কার্যকলাপৰে জড়িত থকা টিংৰাজ ওৰাঙে উজনি অসমত চিপিআই (মাও)ৰ সাংগঠনিক কাম–কাজত জড়িত হৈ আছে৷ বিশেষকৈ ডিব্রুগড়ৰ নাহৰণি জয়পুৰত মাওবাদী সাংগঠনিক ভেটি শক্তিশালী কৰাত গুৰুত্বপূর্ণ ভূমিকা লৈছিল ওৰাঙে৷ চিপিআই (মাওইষ্ট) অসম শাখাৰ সাংগঠনিক কমিটীৰ আহ্বায়কৰ দায়িত্বত থকা টিংৰাজ ওৰাঙে বামপন্থী সংগঠন এছএফআই আৰু চিপিআই (মাওইষ্ট)ত যোগদান কৰি ১৯৮৯ চনৰ পৰা ১৯৯১ চনলৈ সদস্য হিচাপে কাম কৰিছিল৷ ওৰাঙে আদিবাসী চাহ জনগোষ্ঠী সুৰক্ষা সমিতিৰ সভাপতিৰ দায়িত্ব পালন কৰাৰ লগতে ইষ্টার্ন ৰিজি’নেল ব্যুৰ’ৰ কিষাণ দাৰ সহযোগত চিপিআই (মাওইষ্ট) উগ্রপন্থী সংগঠনত আনুষ্ঠানিকভাৱে যোগদান কৰে৷
উল্লেখ্য যে ২০১১ চনত টিংৰাজ ওৰাঙে অসমৰ দুজন মাওবাদী সংগঠনৰ সদস্য আদিত্য বৰা আৰু অজয় চাবৰৰ সৈতে ওড়িশাৰ ৰুড়কেল্লাত গ্রেপ্তাৰ হয়৷ ডিব্রুগড় জিলাৰ নাহৰণিৰ জয়পুৰ ব্লকৰ ২নং শামুকতোলা গাঁৱৰ বাসিন্দা টিংৰাজৰ আত্মসমর্পণ মাওবাদী সংগঠনৰ বাবে বৃহৎ আঘাত ৰূপে বিবেচিত হৈছে৷ উজনি অসমৰ লগতে বৰাক উপত্যকাতো মাওবাদী সংগঠনৰ ভেটি শক্তিশালী কৰাত মুখ্য ভূমিকা লোৱা মাওবাদী নেতাজনে মূলসুঁতিলৈ ঘূৰি অহাটো অসম আৰক্ষীৰ বাবেও মাওবাদীৰ বিৰুদ্ধে চলি থকা অভিযান সফলদায়ক বুলি বিবেচিত হৈছে৷