ভাৰত-ইংলেণ্ড টি-২০ শৃংখলাৰ পূৰ্বে ভাৰতীয় বেটাৰ অভিষেক শৰ্মাই আইচিচিৰ শেহতীয়া টি-২০ বেটিং ৰেংকিঙত ডাঙৰ আঘাত পাইছে। বিগত বৰ্ষৰ জুলাই মাহত বিশ্বৰ এক নম্বৰ টি-২০ বেটাৰ হোৱা অভিষেক এতিয়া দ্বিতীয় স্থানলৈ নামি আহিছে। তেওঁৰ পৰা শীৰ্ষস্থান দখল কৰিছে আন এজন ভাৰতীয় বেটাৰ ঈশান কিষাণে।
১ জুলাইত প্ৰকাশিত আইচিচিৰ শেহতীয়া ৰেংকিং অনুসৰি, ৮৭৬ ৰেটিং পইণ্টেৰে ঈশান কিষাণ বিশ্বৰ এক নম্বৰ টি-২০ বেটাৰ হিচাপে আত্মপ্ৰকাশ কৰিছে। এইটো তেওঁৰ কেৰিয়াৰৰ সৰ্বোচ্চ ৰেটিং। আনহাতে, আয়াৰলেণ্ডৰ বিৰুদ্ধে দ্বিতীয় টি-২০ত শূন্য ৰানত আউট হোৱা অভিষেক শৰ্মা ৮৬৯ ৰেটিং পইণ্টেৰে দ্বিতীয় স্থানলৈ অৱনমিত হৈছে।
শীৰ্ষ-১০ বেটিং ৰেংকিঙতো কিছু পৰিৱৰ্তন দেখা গৈছে। ইংলেণ্ডৰ জ’ছ বাটলাৰ ৭১৬ ৰেটিং পইণ্টেৰে সপ্তম স্থানলৈ নামিছে। ভাৰতৰ সূৰ্যকুমাৰ যাদৱ ৭০৮ ৰেটিং পইণ্টেৰে অষ্টম স্থানত অৱস্থান কৰিছে।
চলিত বৰ্ষৰ টি-২০ বিশ্বকাপৰ পূৰ্বে নিউজিলেণ্ড ভ্ৰমণৰ জৰিয়তে টি-২০ দললৈ উভতি অহা ঈশান কিষাণে ধাৰাবাহিকভাৱে উৎকৃষ্ট প্ৰদৰ্শন আগবঢ়াই ৰেংকিঙত দ্ৰুতগতিত ওপৰলৈ উঠি অৱশেষত শীৰ্ষস্থান দখল কৰিবলৈ সক্ষম হৈছে।
আইচিচিৰ টি-২০ বলিং ৰেংকিঙতো ভাৰতীয় স্পিনাৰ বৰুণ চক্ৰৱৰ্তীয়ে এটা স্থান হেৰুৱাই তৃতীয় স্থানলৈ নামি আহিছে। আঘাতৰ বাবে তেওঁ আয়াৰলেণ্ডৰ বিৰুদ্ধে টি-২০ শৃংখলাত অংশগ্ৰহণ কৰিব পৰা নাছিল। পাকিস্তানৰ আবৰাৰ আহমেদ দ্বিতীয় স্থানলৈ উন্নীত হৈছে। আফগানিস্তানৰ ৰাছিদ খান ৭৫৩ ৰেটিং পইণ্টেৰে এতিয়াও বিশ্বৰ এক নম্বৰ টি-২০ বলাৰ হৈ আছে।
ভাৰতীয় অলৰাউণ্ডাৰ শিৱম ডুবেই টি-২০ অলৰাউণ্ডাৰ ৰেংকিঙত ৩টা স্থান আগবাঢ়ি ২২০ ৰেটিং পইণ্টেৰে সপ্তম স্থানত উপনীত হৈছে। এইটোও তেওঁৰ কেৰিয়াৰৰ সৰ্বোচ্চ ৰেটিং। এই তালিকাৰ শীৰ্ষস্থানত আছে জিম্বাবুৱেৰ চিকন্দৰ ৰাজা, আনহাতে ভাৰতৰ হাৰ্দিক পাণ্ডিয়া দ্বিতীয় স্থানত আছে।
ডিজিটেল ডেস্ক, ১ জুলাই