ভাৰতীয় ক্ৰিকেট দলৰ প্ৰাক্তন অধিনায়ক ৰোহিত শৰ্মাৰ উজ্জ্বল আন্তঃৰাষ্ট্ৰীয় কেৰিয়াৰ অন্তিম পৰ্যায়লৈ আগবাঢ়িছে বুলি জল্পনা তীব্ৰ হৈছে। বিভিন্ন সংবাদ মাধ্যমৰ প্ৰতিবেদন অনুসৰি, ১৯ জুলাইত লণ্ডনৰ লৰ্ডছত ইংলেণ্ডৰ বিৰুদ্ধে অনুষ্ঠিত হ’বলগীয়া তৃতীয় এদিনীয়া মেচখনেই ৰোহিতৰ অন্তিম আন্তঃৰাষ্ট্ৰীয় মেচ হ’ব পাৰে।
খবৰ অনুসৰি, নিৰ্বাচক মণ্ডলী আৰু টীম মেনেজমেণ্টে ২০২৭ চনৰ এদিনীয়া বিশ্বকাপৰ পৰিকল্পনাত ৰোহিত শৰ্মাক অন্তৰ্ভুক্ত নকৰাৰ সিদ্ধান্ত লৈছে। ইয়াৰ পিছতেই কিয় এজন অভিজ্ঞ আৰু সফল মেচ বিজয়ীক ভৱিষ্যতৰ পৰিকল্পনাৰ পৰা আঁতৰাই ৰখা হৈছে, সেই প্ৰশ্ন উত্থাপিত হৈছে।
ৰোহিত শৰ্মাৰ ভৱিষ্যতক লৈ উত্থাপিত হোৱা প্ৰথম আৰু অন্যতম গুৰুত্বপূৰ্ণ কাৰণ হৈছে তেওঁৰ ফিটনেছ। যোৱা এবছৰত তেওঁ নিজৰ ফিটনেছ উন্নত কৰিবলৈ যথেষ্ট পৰিশ্ৰম কৰিছিল আৰু ওজনো হ্ৰাস কৰিছিল। কিন্তু আঘাতে তেওঁক এৰি যোৱা নাই।
আইপিএল ২০২৬ৰ সময়ত হেমষ্ট্ৰিং আঘাতৰ বাবে তেওঁ পাঁচখন মেচ খেলিব নোৱাৰিছিল। ইয়াৰ পিছত আফগানিস্তানৰ বিৰুদ্ধে এদিনীয়া শৃংখলাৰ পূৰ্বেও তেওঁৰ ফিটনেছক লৈ অনিশ্চয়তা অব্যাহত আছিল। ফলত দীৰ্ঘম্যাদীভাৱে তেওঁক দলত উপলব্ধ পোৱাৰ বিষয়টো নিৰ্বাচকসকলৰ বাবে চিন্তাৰ কাৰণ হৈ পৰিছে।
ফিটনেছৰ লগতে শেহতীয়া সময়ত ৰোহিত শৰ্মাৰ বেটিং প্ৰদৰ্শনেও হতাশ কৰিছে। ২০২৬ বৰ্ষত এদিনীয়া ক্ৰিকেটত তেওঁৰ প্ৰদৰ্শন আশানুৰূপ হোৱা নাই।
ইংলেণ্ডৰ বিৰুদ্ধে প্ৰথম দুয়োখন এদিনীয়াতে তেওঁ ডাঙৰ ইনিংছ খেলিবলৈ ব্যৰ্থ হয়। চলিত বৰ্ষত ৮টা ইনিংছত তেওঁ মাত্ৰ ২৪১ ৰান সংগ্ৰহ কৰিছে, য’ত তেওঁৰ গড় ৩০.১২।
ইয়াৰ উপৰি অধিনায়কত্ব এৰাৰ পিছৰে পৰা তেওঁৰ ষ্ট্ৰাইক ৰেটো যথেষ্ট হ্ৰাস পাইছে। পূৰ্বে পাৱাৰপ্লেত ১২০ৰ অধিক ষ্ট্ৰাইক ৰেটত বেটিং কৰা ৰোহিতে এতিয়া ৯০ৰ তললৈ নামি অহা দেখা গৈছে।
ৰোহিত শৰ্মাৰ সন্মুখত আন এক ডাঙৰ প্ৰত্যাহ্বান হৈছে দলত যুৱ খেলুৱৈসকলৰ শক্তিশালী উপস্থিতি। অ’পেনাৰ হিচাপে যশস্বী জয়ছোৱালে অসাধাৰণ প্ৰদৰ্শনেৰে নিজৰ দাবী শক্তিশালী কৰিছে। মাত্ৰ ৬খন এদিনীয়া মেচতে তেওঁ ২টা শতক অৰ্জন কৰাৰ লগতে তেওঁৰ বেটিং গড় ৭০ৰো অধিক।
আনহাতে, ঈশান কিশনেও পুনৰ এদিনীয়া দলত স্থান লাভ কৰিছে। তেওঁৰ নামত ৪৫ৰ অধিক গড়ে ১,০৯২ ৰান আৰু এটা দ্বিশতক আছে। উইকেটকীপাৰ-বেটাৰ হিচাপে থকা অতিৰিক্ত সুবিধায়ো তেওঁক নিৰ্বাচনৰ দৌৰত অধিক শক্তিশালী কৰি তুলিছে।
এই সকলো দিশ বিবেচনা কৰি, ভৱিষ্যতৰ কথা মনত ৰাখি টীম মেনেজমেণ্টে যুৱ খেলুৱৈসকলৰ ওপৰত অধিক আস্থা প্ৰকাশ কৰাৰ সম্ভাৱনা দেখা গৈছে। উল্লেখ্য যে ৰোহিত শৰ্মাৰ অৱসৰ সম্পৰ্কে এতিয়ালৈকে ভাৰতীয় ক্ৰিকেট নিয়ন্ত্ৰণ ব’ৰ্ড (BCCI) বা ৰোহিত শৰ্মাই কোনো আনুষ্ঠানিক ঘোষণা কৰা নাই।
ডিজিটেল ডেস্ক, ১৭ জুলাই