🔹 যুঁজত থাকিব ১৩ বছৰীয়া বৈভৱৰ পৰা ৪২ বছৰীয়া এণ্ডাৰছন
নিউজ ডেস্ক, ১৮ নৱেম্বৰ : ক্রমশঃ কাষ চাপি আহিছে আইপিএল মহানিলামৰ দিন–ক্ষণ৷ ইতিমধ্যে প্রকাশ পাইছে নিলামত অন্তর্ভুক্ত ক্রিকেটাৰসকলৰ চূড়ান্ত তালিকা৷ আইপিএলৰ মঞ্চত উত্থান ঘটিছে বহু উদীয়মান প্রতিভাৰ৷ আনহাতে, প্রত্যাৱর্তন ঘটিছে বহু ক্রিকেটাৰৰ৷ সেই মঞ্চত সন্নিৱিষ্ট হৈছে ১৩ বছৰ বয়সীয়া ক্রিকেটাৰো ৷ ইয়াৰ উপৰি আছে ৪২ বছৰীয়া ক্রিকেটাৰ৷ যিয়ে আন্তর্জাতিক ক্রিকেটৰ পৰা অৱসৰ গ্রহণ কৰিছে৷ এইবাৰ নিলামত যুঁজত নামিব ৫৭৪গৰাকী খেলুৱৈ৷ অৱশ্যে তেওঁলোকৰ সকলোৱে দলত স্থান নাপাব৷ কাৰণ ১০টা দলে মুঠ ২০৪জন ক্রিকেটাৰক ক্রয় কৰিব৷ নিলামৰ বাছনি তালিকাত আছে এগৰাকী ১৩ বছৰীয়া ভাৰতীয় উত্থিত তাৰকা৷ তেওঁৰ নাম বৈভৱ সূর্যবংশী৷ আইপিএলৰ নিলামৰ ইতিহাসত বৈভৱেই হ’ব সর্বকনিষ্ঠ ক্রিকেটাৰ৷ স্বাভাৱিকতে তেওঁক লৈ আৰম্ভ হৈছে আলোড়ন৷ কোন এই বৈভৱ? বাঁওহতীয়া এই বেটাৰৰ প্রথম শ্রেণীৰ ক্রিকেটত এই বছৰেই অভিষেক ঘটিছে বিহাৰৰ জার্ছীত৷ তাৰ পিছত খেলিছে অষ্ট্রেলিয়াৰ বিৰুদ্ধে, ভাৰতৰ অনূর্ধ্ব ১৯ টেষ্ট শৃংখলাত৷ তাত প্রথম টেষ্টত শতৰান কৰে বৈভৱে৷ অৱশ্যে সেই তুলনাত প্রথম শ্রেণীৰ ক্রিকেটত এতিয়াও তেওঁ প্রতিভাৰ চমক দেখুৱাব পৰা নাই৷ এই পর্যন্ত ১০টা ইনিংছত সংগ্রহ কৰিছে ১০০ ৰান৷ এইবাৰ তেওঁ ৩০ লাখ টকাৰ ন্যূনতম মূল্যত আইপিএলৰ মঞ্চত প্রতিভা প্রদর্শনৰ সুযোগ পাবনে, সেয়া লক্ষণীয় হ’ব৷ ইয়াৰ বিপৰীতে আছে ৪২ বছৰীয়া ক্রিকেটাৰ জেমছ এণ্ড্রাৰচন৷ ইংলেণ্ডৰ এইগৰাকী কিংবদন্তি বলাৰে চলিত বর্ষতে ক্রিকেটৰ পৰা অৱসৰ গ্রহণ কৰিছে৷ অৱসৰৰ পিছতেই সক্রিয় ক্রিকেটত থাকিব বিচৰা এণ্ড্রাৰচনে ইয়াৰ পিছতেই নামিব বিচাৰিছে আইপিএলৰ প্রতিদ্বন্দ্বিতাত৷ এইবাৰ তেওঁ আটাইতকৈ বয়স্ক ক্রিকেটাৰ ৰূপে পৰিগণিত হৈছে৷ আমোদজনক কথাটো হৈছে, ইয়াৰ পূর্বে তেওঁ কেতিয়াও আইপিএলৰ নিলামত অংশগ্রহণ কৰা নাই৷ অৱসৰৰ পিছতেই এণ্ড্রাৰচনে আইপিএলৰ নিলামত ন্যূনতম মূল্য স্থিৰ কৰিছে ১.২৫ কোটি টকা৷ অৱশ্যে তেওঁৰ দেশৰেই আন এগৰাকী ক্রিকেটাৰ জোফ্রা আর্ছাৰৰ নাম নাই নিলামত৷ ইংলেণ্ডৰ পৰৱর্তী টেষ্ট শৃংখলাৰ বাবে তেওঁ নিজকে ফিট ৰাখিবলৈ চেষ্টা চলাইছে৷