নিয়মীয়া বাৰ্তা ১৩ আগষ্টঃ টকিঅ’ অলিম্পিকত পদক জয়েৰে দেশবাসীক গর্বিত কৰা খেলুৱৈসকলক লৈ দেশৰ চৌদিশে উছাহ–উদ্দীপনা বিৰাজ কৰাৰ সময়তে হতাশাই ঘেৰি ধৰিছে ভিনেশ ফ’গাটক৷ টকিঅ’ত প্রত্যাশিত প্রদর্শন দাঙি ধৰিব নোৱাৰা তাৰকা মল্লযুঁজাৰুগৰাকীয়ে ক্রীড়া কেৰিয়াৰ সামৰিব পাৰে বুলিও শুকুৰবাৰে এক সাক্ষাৎকাৰত ইংগিত দিছে৷
এক সাক্ষাৎকাৰত তেওঁ কয় যে পদক জয় কৰিব পাৰিলেই ভাৰতত নায়ক হয় আৰু জয় কৰিব নোৱাৰিলে এদিনৰ ভিতৰতে মানুহে খেলুৱৈসকলক পাহৰি যায়৷
উল্লেখ্য যে ৰিঅ’ অলিম্পিকত আঘাতৰ বাবে পদকৰ সপোন পূৰণ কৰিব নোৱাৰা ভিনেশ ফ’গাটে এইবাৰ টকিঅ’ৰ পৰা দেশলৈ পদক কঢ়িয়াই অনাৰ সপোন দেখিছিল যদিও কোৱার্টাৰত অপ্রত্যাশিত পৰাজয়ৰ সন্মুখীন হয়৷ বেলাৰুছৰ প্রতিদ্বন্দ্বীৰ হাতত তেওঁ পৰাস্ত হৈ টকিঅ’ত অভিযান সামৰিছিল৷
‘টকিঅ’ত পদক জয়ৰ সপোন পূৰণ কৰিব পাৰিম বুলি আশাৰে বাট চাইছিলোঁ৷ কিন্তু সেয়া সম্ভৱ নহ’ল৷ খেলৰ সময়ত মই আঘাতৰ সন্মুখীন হৈছিলোঁ৷ মই এতিয়া এনেকুৱা অনুভৱ কৰিছোঁ যে মোৰ শৰীৰ ভগা নাই, কিন্তু মোৰ মনহে ভাগি পৰিছে৷ পুনৰ কেতিয়া মল্লযুঁজলৈ প্রত্যাৱর্তন কৰিম, তাৰ কোনো নিশ্চয়তা নাই৷ হয়তো নকৰিবও পাৰো’– মল্লযুঁজাৰুগৰাকীয়ে এইদৰে কয়৷
ইফালে, বিগত ১৪ মাহত দুবাৰকৈ ক’ভিড পজিটিভ হোৱাৰ বাবে অলিম্পিকৰ প্রস্তুতিত তেওঁ যথেষ্ট বাধাৰ সন্মুখীন হৈছিল বুলিও ফ’গাটে জানিবলৈ দিয়ে৷ তেওঁ পুনৰ কয় যে অলিম্পিকত অংশ লোৱাৰ সময়ত তেওঁৰ মানসিক স্থিতি সঠিক নাছিল৷ টকিঅ’ অলিম্পিকত অনুশাসন ভংগ কৰাৰ অভিযোগত ভিনেশক শেহতীয়াকৈ ভাৰতীয় ৰেষ্টলিং ফেডাৰেচনে সাময়িকভাৱে নিলম্বন কৰিছে৷ ফেডাৰেচনে তেওঁক অনুশাসন ভংগৰ কাৰণ ব্যাখ্যা কৰিবলৈ অহা ১৬ আগষ্টলৈ সময় বান্ধি দিছে৷