নিয়মীয়া বাৰ্তা ডিজিটেল, ১০ ফেব্ৰুৱাৰীঃ অভিজ্ঞ অপেনাৰ ডেভিদ ৱার্নাৰে অষ্ট্রেলিয়াৰ প্রথমগৰাকী খেলুৱৈ হিচাপে ক্রিকেটৰ তিনিওটা সংস্কৰণৰে শততম মেচ খেলি এক অনন্য অভিলেখ ৰছিলে৷ হ’বার্টত ৱেষ্ট ইণ্ডিজৰ বিপক্ষে টি-২০ মেচখনত ভাগ লৈ এই অনন্য অভিলেখৰ গৰাকী হয় ৱার্নাৰ৷ ৱার্নাৰৰ পূর্বে ক্রিকেটৰ তিনিওটা সংস্কৰণৰে শততম মেচ খেলা বিশ্বৰ আন দুগৰাকী খেলুৱৈ হ’ল টীম ইণ্ডিয়াৰ বিৰাট কোহলি আৰু নিউজিলেণ্ডৰ ৰ’ছ টেইলৰ৷ ইফালে শততম টি-২০ মেচ খেলি অষ্ট্রেলিয়াৰ তৃতীয়গৰাকী বেটাৰ ৰূপে পৰিগণিত হয় ডেভিদ ৱার্নাৰ৷ ৱার্নাৰৰ পূর্বে অষ্ট্রেলিয়াৰ হৈ শততম টি-২০ মেচ খেলা আন দুগৰাকী খেলুৱৈ হ’ল প্রাক্তন অধিনায়ক আৰ’ন ফিনছ (১০৩) আৰু অলৰাউণ্ডাৰ গ্লেন মেক্সৱেল (১০০)৷ মন কৰিবলগীয়া যে মেক্সৱেলে ৱেষ্ট ইণ্ডিজৰে টি-২০ মেচখন খেলি এই মাইলষ্ট’নত প্রৱেশ কৰে৷