নিয়মীয়া বাৰ্তা, ১১মাৰ্চঃ সদ্যঘোষিত পৌৰ নিৰ্বাচনৰ ফলাফলত শাসক দল বিজেপিয়ে ঢকুৱাখনা পৌৰসভাৰ মুঠ ১০টা ৱাৰ্ডৰ ভিতৰত ৯টা ৱাৰ্ডতে নিৰংকুশ বিজয় সাব্যস্ত কৰি একক সংখ্যাগৰিষ্ঠতাৰে পৌৰসভা গঠনৰ কৃতিত্ব অৰ্জন কৰাৰ পাছত ঢকুৱাখনাৰ পৌৰপতি কোন হ’ব, এই লৈ চলিছে ব্যাপক চর্চা।উল্লেখ্য যে নগৰ সমিতিৰ পৰা পৌৰসভালৈ উন্নীত হোৱা ঢকুৱাখনা পৌৰসভাৰ সভাপতি আৰু উপ সভাপতিৰ বাছনিক লৈ এতিয়া দলীয় বিষয়ববীয়া আৰু বিজয়ী প্ৰাৰ্থীসকলৰ মাজত টনা-আঁজোৰা আৰম্ভ হৈছে। পৌৰপতিৰ দৌৰত থকা নেতা-নেত্ৰীসকলে সন্মানীয় আসনখনৰ লাভৰ বাবে দলীয় নেতৃত্ব আৰু ঢকুৱাখনাৰ স্থানীয় বিধায়ক নৱ কুমাৰ দলেৰ দৃষ্টি আকৰ্ষণৰ বাবে ইতিমধ্যে প্ৰচেষ্টা আৰম্ভ কৰিছে।এই মুহূৰ্তত পৌৰপতিৰ দৌৰৰ প্ৰধান দাবীদাৰ হৈছে স্বৰূপ কোঁৱৰ আৰু তিলেন দাস। বিধায়ক নৱ দলেৰ গৃহ ৱাৰ্ড ৬নং ৱাৰ্ডৰ পৰা জয়লাভ কৰিছে স্বৰূপ কোঁৱৰে। সেয়ে নৱ কুমাৰ দলেৰ অতি ঘনিষ্ঠ তথা বিশ্বস্ত স্বৰূপ কোঁৱৰ ঢকুৱাখনা পৌৰসভাৰ পৰৱৰ্তী পৌৰপতি হবগৈ নেকি বুলিও সৰৱ আলোচনা হৈছে যদিও ঢকুৱাখনা বিজেপিৰ এটা শক্তিশালী শিবিৰে ৫ নম্বৰ ৱাৰ্ডৰ বিজয়ী প্ৰাৰ্থী যুৱনেতা তিলেন দাসৰ নামো পৌৰপতি পদৰ বাবে প্ৰক্ষেপ কৰিছে। তিলেন দাস দলটোৰ এগৰাকী ৰাজ্যিক পৰ্য্যায়ৰ নেতাৰে যথেষ্ট মধুৰ সম্পর্ক বুলি দলটোৰ ভিতৰচৰাৰ নিৰ্ভৰযোগ্য সূত্ৰৰ পৰা জানিব পৰা গৈছে।তদুপৰি ঢকুৱাখনা জিলা বিজেপি যুৱ মৰ্চাৰো পৌৰপতি আসনৰ প্ৰথম পছন্দৰ প্ৰাৰ্থী তিলেন দাস বুলি বিশেষ সূত্ৰে প্ৰকাশ। কিন্তু ১০টা ৱাৰ্ডৰ ৯টা ৱাৰ্ডেই বিজেপিৰ দখললৈ আনিবলৈ সক্ষম হোৱাৰ অন্তৰালৰ অন্যতম ব্যক্তি হৈছে স্থানীয় বিধায়ক তথা দলটোৰ ৰাজ্যিক উপ-সভাপতি নৱ কুমাৰ দলে। এনেস্থলত বিধায়ক নৱকুমাৰ দলেৰ আশীৰ্বাদ আদায় কৰিব পৰাজনেই যে পৌৰপতিৰ চকীখন লাভ কৰাত সফল হ’ব সেয়া প্ৰায় নিশ্চিত।
প্ৰেৰক পুলকজ্যোতি বৰা