নিয়মীয়া বাৰ্তা, ২১ এপ্ৰিলঃ দল ত্যাগৰ পাছতে ৰাইজৰ দলৰ সভাপতি অখিল গগৈৰ বিৰুদ্ধে সৰৱ হৈ পৰিছে কমল কুমাৰ মেধি৷ সংবাদ মাধ্যমৰ সন্মুখত মেধিয়ে কয় যে ঘটনাক্রমেৰেহে ৰাইজৰ দল গঠন হৈছিল৷ কেৱল জে’লৰ পৰা ওলাবৰ কাৰণেহে হয়তো এটা ৰণকৌশল হিচাপেহে অখিল গগৈয়ে ৰাইজৰ দল গঠন কৰিছিল৷ সভাপতিগৰাকীয়ে বিভিন্ন সময়ত কৰা মন্তব্যই দলটোৰ নেতা–কর্মীসকলৰ ওপৰত নেতিবাচক প্রভাৱ পেলাইছে বুলি সদৰী কৰি মেধিয়ে কয়– ‘আমাৰ দলৰ সভাপতি অখিল গগৈৰ বিৰুদ্ধে ক’বলগীয়া কথা বহুত আছে৷ গগৈয়ে প্রকাশ কৰি আহিছে যে তেওঁ আচলতে ঘটনাক্রমেৰেহে হেনো ৰাজনীতিলৈ আহিল৷ তেওঁ ৰাজনীতিলৈ আহি হেনো ভুল কৰিলে৷ যাৰ বাবে এতিয়া তেওঁ পুনৰ ৰাজপথৰ সংগ্রামলৈ উভতি যাব বিচাৰিছে৷ তেওঁ কৌশলগত কাৰণতো হয়তো এনে কথা ক’ব পাৰে৷ কিন্তু তেওঁৰ এই কথাই দলৰ নেতা–কর্মীসকলৰ মাজত এক নেতিবাচক প্রভাৱ পেলাইছে৷ দলৰ সভাপতিগৰাকীয়ে যিকোনো সময়ত ৰাজনীতি ত্যাগ কৰি ৰাজপথৰ সংগ্রামলৈ যাব বুলি ঘোষণা কৰিলে, আন নেতা–কর্মীসকলে কি কৰিব? নতুন মানুহ এই দলটোলৈ কি কাৰণে আহিব৷ য’ত সভাপতিয়ে ৰাজনীতি এৰি দিব বিচাৰে৷’ ইপিনে জে’লৰ পৰা মুকলি হৈ অহাৰ পাছত দলটো সঠিকভাৱে আগবঢ়াই নিয়াত তৎপৰতা দেখুওৱা পৰিলক্ষিত হোৱা নাই বুলিও মেধিয়ে প্রকাশ কৰিছে৷