বসন্ত সুন্দৰীৰ খিতাপ ৰশ্মিৰেখাৰ শিৰতঃ হোজাই কেন্দ্ৰীয় ৰঙালী উদযাপন সমিতিয়ে আয়োজন কৰা পৰম্পৰাগত সাজপাৰ প্ৰতিযোগিতা
নিয়মীয়া বার্তা, ৬ মে : ৰূপালী জয়ন্তী অতিক্ৰম কৰা হোজাইৰ বিহুতলীৰ কেন্দ্ৰীয় ৰঙালী উদযাপন সমিতিয়ে আয়োজন কৰা পৰম্পৰাগত সাজপাৰ প্ৰতিযোগিতাত এই বৰ্ষৰ বসন্ত সুন্দৰীৰ খিতাপ লাভ কৰে ৰশ্মিৰেখা বৰাই । তিনিদিনীয়া কাৰ্যসূচীৰে আয়োজিত এই বিহু উদযাপনৰ প্ৰথম দিনৰ কাৰ্যসূচী হিচাপে যোৱানিশা এই প্ৰতিযোগিতা অনুষ্ঠিত হৈছিল । এই প্ৰতিযোগিতাত বিচাৰকৰ বাছনিত শ্ৰেষ্ঠ সন্মান লাভ কৰি বসন্ত সুন্দৰী হিচাপে বৰা নিৰ্বাচিত হয় ৰশ্মিৰেখা। হোজাই নতুন বজাৰৰ আচাৰ্য একাডেমীত উচ্চতৰ মাধ্যমিক বাণিজ্য শাখাৰ চূড়ান্ত পৰীক্ষাৰ্থী ৰশ্মিৰেখা হোজাই গোবিনপুৰৰ জনস্বাস্থ্য কাৰিকৰী বিভাগৰ কৰ্মচাৰী দীপক চন্দ্ৰ বৰাৰ কনিষ্ঠ কন্যা । বিজয়ী ৰশ্মিৰেখাক পুৰস্কাৰ হিচাপে শিৰ মুকুট, মানপত্ৰ, জাপি, গামোচা, মানিপ্লেণ্ট সহ আঠ বিধ সামগ্ৰী প্ৰদান কৰা হয় । এই প্ৰতিযোগিতাত প্ৰথম দ্বিতীয় ৰানাৰ্ছ আপ হয় ক্ৰমে মৌচুমী বৰা আৰু সংযুক্তা মেছে ।
প্ৰেৰক কিশলয় ডি গোস্বামী