নিয়মীয়া বাৰ্তা, ২২ আগষ্টঃ মুখ্যমন্ত্রীৰ কন্যা বাবেই চিকিৎসকৰ আগতীয়া এপইণ্টমেণ্ট নোলোৱাকৈ ক্লিনিকত হাজিৰ হৈ চিকিৎসকক মুখত ঘুচিওৱা ঘটনাক লৈ তীব্র চাঞ্চল্যৰ সৃষ্টি হৈছে মিজোৰামত৷ এই ঘটনাৰ বাবে চিকিৎসকগৰাকীৰ ওচৰত ক্ষমা বিচাৰিবলৈ বাধ্য হৈছে মিজোৰামৰ মুখ্যমন্ত্রী জোৰামথাংগা৷ তৰুণ চিকিৎসকে মুখ্যমন্ত্রীৰ কন্যাক আগতীয়াকৈ এপইণ্টমেণ্ট নোলোৱাৰ বাবে দেখা কৰিবলৈ অস্বীকাৰ কৰিছিল৷ ইয়াতেই ক্ষুব্ধ হৈ পৰে জোৰামথাংগাৰ দুহিতা৷ ইতিমধ্যে চিকিৎসকগৰাকীক মুখ্যমন্ত্রীৰ কন্যাই প্রহাৰ কৰা ভিডি’ ছ’চিয়েল মিডিয়াত ভাইৰেল হৈ পৰে৷ লগে লগে বিষয়টোক লৈ উত্তপ্ত পৰিস্থিতিৰ সৃষ্টি হয় মিজোৰামত৷ জোৰামথাংগাৰ কন্যা মিলাৰি ছাংতেই যোৱা বুধবাৰে এনেদৰে চিকিৎসকক আইজলৰ এখন ক্লিনিকত প্রহাৰ কৰিছিল৷ মুখ্যমন্ত্রীৰ কন্যা বাবেই নিয়ম উলংঘা কৰাটো সম্ভৱ নহয় বুলি ঘোষণা কৰিছিল চিকিৎসকগৰাকীয়ে৷