নিয়মীয়া বাৰ্তা, ৫ নৱেম্বৰঃ অহা ৮ নৱেম্বৰত অনুষ্ঠিত হ’বলগীয়া দেউৰী স্বায়ত্তশাসিত পৰিষদৰ নিৰ্বাচনৰ প্ৰচাৰ এতিয়া তুংগত উঠিছে। বিজেপি-অসম গণ পৰিষদৰ প্ৰাৰ্থীসকলৰ সমৰ্থনত শাসকীয় মিত্ৰজোঁট চৰকাৰৰ মন্ত্ৰী, সাংসদ আৰু বিধায়কসকলে জোৰদাৰ নিৰ্বাচনী প্ৰচাৰ কাৰ্য অব্যাহত ৰাখিছে। আজি যোৰহাটত ৮নং যোৰহাট পৰিষদীয় সমষ্টিৰ অন্তৰ্গত ওপৰদেউৰী আৰু নামদেউৰী অঞ্চলত অগপৰ সভাপতি তথা কৃষিমন্ত্ৰী অতুল বৰা, কাৰ্যকৰী সভাপতি তথা মন্ত্ৰী কেশৱ মহন্ত আৰু বিজেপিৰ নেতা তথা মন্ত্ৰী জয়ন্ত মল্ল বৰুৱাই ৮নং সমষ্টিটোৰ মিত্ৰজোঁটৰ প্ৰাৰ্থী কেনেডী দেউৰীৰ হৈ নিৰ্বাচনী প্ৰচাৰ চলায়। মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত চলা অসমৰ বিৰামহীন প্ৰগতিৰ যাত্ৰাক অধিক সক্ৰিয় কৰিবলৈ দেউৰী স্বায়ত্তশাসিত পৰিষদৰ নিৰ্বাচনত মিত্ৰজোঁটৰ প্ৰাৰ্থীসকলক বিপুলসংখ্যক ভোটদানেৰে জয়যুক্ত কৰিবলৈ কৃষিমন্ত্ৰী অতুল বৰাই উপস্থিত ৰাইজক আহ্বান জনায়। দুখীয়া লোকসকলৰ চিকিৎসাৰ বাবে লোৱা বিভিন্ন নতুন আঁচনিৰ বিষয়ে উল্লেখ কৰি মন্ত্ৰী কেশৱ মহন্তই ভোটদাতা ৰাইজক আকৰ্ষিত কৰে। ৰাজ্য চৰকাৰে জনজাতীয় লোকসকলৰ ভূমিৰ অধিকাৰ তথা অন্যান্য কল্যাণকামী পদক্ষেপৰ প্ৰসংগৰে ভাষণ প্ৰদান কৰি মন্ত্ৰী জয়ন্ত মল্ল বৰুৱাই ৰাইজক বিপুল হাৰত ভোট প্ৰদান কৰি প্ৰাৰ্থীসকলক জয়যুক্ত কৰিবলৈ আহ্বান জনায়। প্ৰচাৰ সভাত অগপৰ জ্যেষ্ঠ নেতা ফণীভূষণ চৌধুৰী, সাংসদদ্বয় কামাখ্যা প্ৰসাদ তাছা, তপন কুমাৰ গগৈ, বিধায়কদ্বয় ৰূপজ্যোতি কুৰ্মী, ভবেন্দ্ৰনাথ ভৰালী, মিচিং স্বায়ত্তশাসিত পৰিষদৰ কাৰ্যবাহী সদস্য পুৰুষোত্তম দলে, প্ৰাক্তন বিধায়িকা সুশীলা হাজৰিকা প্ৰমুখ্যে অগপ, বিজেপি, সন্মিলিত গণশক্তিৰ স্থানীয় নেতৃত্ব, বিষয়ববীয়াসকল, কৰ্মকৰ্তা আৰু ৰাইজ উপস্থিত থাকে।