নিয়মীয়া বাৰ্তা,১১ এপ্ৰিল:অসম ৰাজ্যিক গ্ৰামীণ জীৱিকা অভিযান, ধুবুৰী আৰু জিলা গ্ৰামোন্নয়ন বিভাগৰ উদ্যোগত তথা ধুবুৰী জিলা প্ৰশাসনৰ সহযোগত আজিৰ পৰা ধুবুৰীত আৰম্ভ হৈছে “অসমী বহাগী মেলা-২০২৩”। ধুবুৰী চহৰৰ ঐতিহ্যমণ্ডিত ৰজা প্ৰভাত চন্দ্ৰ বৰুৱা খেলপথাৰত আৰম্ভ হোৱা এই তিনিদিনীয়া মেলাখনৰ আজি দুপৰীয়া আনুষ্ঠানিক ভাৱে উদ্বোধন কৰে ধুবুৰী জিলাৰ উপায়ুক্ত দিবাকর নাথে। আজিৰ সেই উদ্বোধনী অনুষ্ঠানত ধুবুৰী জিলা পৰিষদৰ কাৰ্য্যবাহী বিষয়া বিশ্বজিৎ গোস্বামী, ধুবুৰী পৌৰসভাৰ অধ্যক্ষ ডাঃ দেৱময় সান্ন্যাল প্ৰমুখ্যে জিলা প্ৰশাসনৰ বিভিন্ন স্তৰৰ কৰ্মচাৰী উপস্থিত আছিল। ধুবুৰী জিলাৰ প্ৰায় ১১টা উন্নয়ন খণ্ডৰ বিভিন্ন আত্মসহায়ক গোটৰ মুঠ ৩০খন বিপনী থকা এই মেলাখনে বিগত বছৰৰ দৰে এইবেলিও ৰাইজৰ সঁহাৰি পাব বুলি আশা কৰিছে উদ্যোক্তাসকলে। বিহুৰ প্ৰাকক্ষণত ধুবুৰী জিলাৰ উন্নয়ন খণ্ডৰ অন্তৰ্গত আত্মসহায়ক গোটসমূহক এখন বজাৰ দিয়াৰ লক্ষ্যৰে আয়োজিত কৰা হৈছে এই মেলাখন। উল্লেখ্য যে, তিনিদিনিয়া মেলাখনৰ সমান্তৰালকৈ মেলাথলীত সাংস্কৃতিক অনুষ্ঠান, খেল-ধেমালি, ছাত্ৰ-ছাত্ৰীৰ মাজত চিত্ৰাংকণ প্ৰতিযোগিতা আদি বিভিন্ন কাৰ্য্যসূচীও হাতত লৈছে উদ্যোক্তাসকলে।