বিশেষ বাৰ্তা, ১৪ মেঃ বংগোপ সাগৰত সৃষ্ট সাগৰীয় ঘূর্ণি ম’কাই সংহাৰী ৰূপ ধাৰণ কৰাৰ প্রতি লক্ষ্য ৰাখি বাংলাদেশত পাঁচ লক্ষাধিক লোকক নিৰাপদ স্থানত আশ্রয় দিয়া হৈছে৷ আজি দক্ষিণ–পূব বাংলাদেশত সাগৰীয় ঘূর্ণি ম’কা অতি ভয়াৱহ হৈ উঠিব৷ ঘণ্টাত ১৭০ কিলোমিটাৰ বেগেৰে বতাহ বলাৰ লগতে ১২ ফুট উচ্চতালৈ ই প্রচণ্ড গতি কৰিব৷ সাগৰীয় ঘূর্ণি ম’কাই বিশ্বৰ বৃহত্তম শৰণার্থী শিবিৰ, কক্স বজাৰত ভয়াৱহ ৰূপ লৈ তাণ্ডৱ চলাব বুলি বতৰ বিজ্ঞান বিভাগে সকীয়নি দিছে৷ ইতিমধ্যে শিবিৰসমূহত বৰষুণ আৰম্ভ হৈছে আৰু ঠায়ে ঠায়ে ৰঙা পতাকা আঁৰি দিয়া হৈছে৷ বিগত দুটা দশকৰ ভিতৰত বাংলাদেশত সাগৰীয় ঘূর্ণি ম’কা সবাতোকৈ শক্তিশালী হ’ব বুলি ধাৰণা কৰা হৈছে৷ বাংলাদেশ–ম্যানমাৰ উপকূলীয় অঞ্চলৰ সমীপত থকা বিমানবন্দৰসমূহ বন্ধ কৰি দিয়া হৈছে৷ মাছমৰীয়াক সাগৰত মাছ মাৰিবলৈ বন্ধ কৰি দিয়া হৈছে৷ ম’কাৰ তাণ্ডৱত ক্ষতিগ্রস্ত হ’ব পৰা অঞ্চলসমূহৰ পৰা লোকসকলক আঁতৰাই নি আশ্রয় শিবিৰত ৰখা হৈছে৷ মন কৰিবলগীয়া যে টার্প’লিনৰ দ্বাৰা নির্মিত শিবিৰত থকা ৰহিংগা শৰণার্থীৰ জীৱনলৈও এই ঘূর্ণিয়ে শংকা নমাই আনিব পাৰে৷