যাৱজ্জীৱন নে মৃত্যুদণ্ড : ডিব্ৰুগড়ৰ চৰিতা মাৰ্ডাৰৰ দোষীৰ কাইলৈ শাস্তিৰ ৰায়দান

বিশেষ বাৰ্তা, ১৭ মেঃ সুদীৰ্ঘ ন বছৰৰ পূৰ্বৰ এক নৃশংস হত্যাকাণ্ডৰ গোচৰত দুই অভিযুক্তৰ এজনক দোষী ৰায়দানৰ বিপৰীতে আনজনক দোষমুক্ত ৰায়দান ডিব্ৰুগড়ৰ জিলা আৰু সত্ৰ ন্যায়াধীশৰ আদালতৰ। ডিব্ৰুগড়ৰ অসম মেডিকেল কলেজৰ চিকিৎসক সৰিতা তচনিৱালৰ চাঞ্চল্যকৰ হত্যাকাণ্ডৰ সন্দৰ্ভত অভিযুক্ত কিৰু মেছক আজি ডিব্ৰুগড়ৰ আদালতৰ চূড়ান্ত ৰায়দানত দোষী সাব্যস্ত কৰিছে। ভাৰতীয় দণ্ডবিধিৰ ৩০২ ধাৰাৰ অধীনত আদালতে দোষী সাব্যস্ত কৰিছে অভিযুক্ত কিৰু মেছক। আনহাতে একেটা গোচৰত অভিযুক্ত চিকিৎসক দীপমনি শইকীয়াক দোষমুক্ত ঘোষণা কৰে আদালতে। ডিব্ৰুগড় মেডিকেলৰ চিকিৎসক সৰিতা হত্যাকাণ্ডৰ সুদীৰ্ঘ ৯ বছৰৰ পাছত ডিব্ৰুগড়ৰ আদালতে আজি দিয়া চূড়ান্ত ৰায়দানত অৱশ্যে অভিযুক্ত ৱাৰ্ডবয় কিৰু মেছৰ শাস্তি যাৱজ্জীৱন কাৰাদণ্ড হবনে? নে ফাঁচী হ’ব? সেই চুড়ান্ত সিদ্ধান্ত কাইলৈ অৰ্থাৎ ১৮ মে’ৰ পুৱা ১০:৩০ বজাত ঘোষণা কৰাৰ কথা আদালতে অৱগত কৰিছে। ইপিনে কৰ্তব্যৰত অৱস্থাত অতি নৃশংসভাবে হত্যাকাণ্ডৰ বলি হোৱা ডাঃ সৰিতা তচনিৱালৰ হত্যাকাণ্ডৰ ৰায়দানৰ সন্দৰ্ভত সন্তুষ্ট নহয় চৰকাৰী অধিবক্তা। ডাঃ সৰিতাৰ অধিবক্তাই এই সন্দৰ্ভত উচ্চ ন্যায়ালয়ত ন্যায়ৰ বাবে পুনৰ আবেদন কৰিব বুলি সদৰী কৰি সংবাদ মাধ্যমক কয় যে ১৫২ পৃষ্ঠাৰ আদালতৰ ৰায়দান অনুসৰি গোচৰীয়া পক্ষই ডাঃ দীপমনি শইকীয়াক, হত্যাত জৰিত থকাতো তথ্যসহ প্ৰমাণ কৰিব নোৱাৰাৰ বিপৰীতে কিৰু মেছ হত্যাত জৰিত হোৱাৰ স্পষ্ট প্ৰমাণিত হোৱা বুলি ৰায়দানত কোৱা হৈছে। আনহাতে অভিযুক্ত কিৰু মেছৰ উপযুক্ত শাস্তিৰ পৰিমাণৰ সন্দৰ্ভত ৰায়দান কাইলৈ পুৱা ১০:৩০ বজাত হব। আদালতৰ ৰায়দানত অসন্তোষ প্ৰকাশ কৰি অধিবক্তা শ্যাম দত্তই, ডাঃ দীপমনি শইকীয়াৰ বিৰুদ্ধে পুনৰ উচ্চ ন্যায়ালয়ত আৱেদন কৰাৰ কথা সদৰী কৰি কয় যে যিহেতু ইমান ভয়াৱহ হত্যাকাণ্ড আছিল, সেয়ে কিৰু মেছে অকলে কৰিব নোৱাৰে আৰু কিৰুৰ সাক্ষীৰ ভাষ্যতো এয়া স্পষ্ট প্ৰমাণিত হৈছে। আদালতত কিৰু মেছে দিয়া সাক্ষ্যদানৰ ভিত্তিত কয় যে প্ৰথমে কিৰু মেছৰ লগত ডাঃ দিপমনিৰ পৰিচয় হৈ ইমান কম দৰমহাৰে পৰিয়াল কেনেকৈ চলে বুলি সুধি, তোমাক মই সহায় কৰিম আৰু তুমিও মোক সহায় কৰি দিব লাগিব বুলি কৈছিল। তেতিয়াই চৰিতাক হত্যা কৰাৰ কথা কিৰু মেছক কৈছিল দীপমনিয়ে। ২০১৪ চনৰ ৮ মে’ৰ নিশা অসম মেডিকেল কলেজৰ প্ৰসূতি বিভাগত নিশাৰ দায়িত্বত ডাঃ দীপমনি শইকীয়া, ডাঃ সৰিতা তচনিৱাল, ৱাৰ্ডবয় কিৰু মেছ, নাৰ্ছ পূৰ্ণিমা বৰা আছিল। কিন্তু সেই নিশা অকৰ্তৃত্বশীলভাবে চিকিৎসক দীপমনি উপস্থিত নাছিল আৰু পুৱা কিৰুৱে সময় পাৰ হল বুলি মিছা কথা কৈ নাৰ্ছগৰাকীক ঘৰলৈ পঠাই দিছিল। তেতিয়াই সম্পূৰ্ণ পূৰ্ব পৰিকল্পনা অনুসৰি জঘন্য হত্যাকাণ্ডটো সংঘটিত হৈছিল বুলি অধিবক্তা শ্যাম দত্তই সদৰী কৰে। অন্যহাতে ডাঃ দীপমণি শইকীয়াৰ পক্ষৰ অধিবক্তা শ্যামল শীলে কয় মুঠ ৬১গৰাকী সাক্ষীৰ কোনো এগৰাকী সাক্ষীয়েও ডাঃ দীপমণি শইকীয়াৰ বিৰুদ্ধে শক্তিশালী ভাৱে তথ্য, প্ৰমাণ প্ৰকাশ কৰিব পৰা নাছিল। আনকি ডাঃ সৰিতা তচনিৱালৰ পিতৃ-মাতৃয়ে আৰু পৰিয়ালে ডাঃ দীপমণি শইকীয়াৰ বিৰুদ্ধেও কোৱা নাছিল। ইফালে ঘটনাৰ সময়চোৱাত কিৰু মেছক আৰক্ষীৰ জিম্মাত থকা সময়ত স্বাস্থ্য পৰীক্ষা কৰা সময়ত আঘাতৰ চিহ্ন পোহৰলৈ অহা বিষয়বিলাক গোচৰটোত উল্লেখযোগ্য আছিল বুলি কয় অধিবক্তা শ্যামল শীলে। মহামান্য আদালতৰ ৰায় ন্যায় সন্মত বুলি উল্লেখ কৰি অধিবক্তা গৰাকীয়ে কয় ৰায়দানত পৰৱৰ্তী আৱেদনৰ বহু পথ মুকলি হৈ আছে আৰু কিৰুৰ ন্যায়ৰ বাবে পুনৰ আবেদন জনোৱাৰ কথা ব্যক্ত কৰে। উল্লেখ্য যে ডাঃ দীপমণি শইকীয়া আৰু কিৰু মেছৰ হৈ ক্ৰমে অধিবক্তা শ্যামল শীল, অধিবক্তা সমীৰ টোডী আৰু এটা দলে একত্রিত ভাৱে কাম কৰিছিল। ডিব্ৰুগড়ৰ জিলা আৰু সত্ৰ ন্যায়াধীশৰ আদালতে সম্পূৰ্ণ ১৫২ পৃষ্ঠাজোৰা ৰায়দান নামা যোগে সুদীর্ঘ ৯ বছৰীয়া গোচৰটোৰ আজি একপ্ৰকাৰ অৱসান ঘটায়। সুদীৰ্ঘ ৯ বছৰ ৯ দিন যোৰা গোচৰটোৰ মুঠ ৬১গৰাকী সাক্ষী আছিল। ক’ভিড মহামাৰীৰ ফলতো গোচৰ প্ৰক্ৰিয়া কিছু দীঘলীয়া হৈছিল। অৱশ্যে ন্যায়ালয়ৰ ৰায়ৰ পাছত সৰিতা তচনিৱাল পক্ষৰ চৰকাৰী অধিবক্তা শ্যাম দত্তই আনগৰাকী অভিযুক্তৰ শাস্তিৰ বাবেও উচ্চ ন্যায়ালয়ৰ দ্বাৰস্ত হোৱাৰ কথা প্ৰকাশ কৰে। ঘটনাৰ অভিযোগত সেই সময়ত কিৰু মেছ আৰু ২০১৪ ৰ ১৪ মে’ত গ্ৰেপ্তাৰ হৈছিল আনজন অভিযুক্ত ডাঃ দীপমণি শইকীয়া। উল্লেখ্য যে সেই সময়ত ঘটনাৰ সন্দৰ্ভত ডিব্ৰুগড় সদৰ থানাত ভাৰতীয় দণ্ডবিধিৰ ৩০২ ধাৰাত ৩৭০/১৪ নম্বৰত এটা গোচৰ পঞ্জীয়ন কৰা হৈছিল।