নিয়মীয়া বাৰ্তা, ১৪ জুন : ভাৰতীয় সেনা বাহিনীৰ লেফটেনেণ্ট পদ অলংকৃত কৰি যোৰহাটলৈ খ্যাতি আৰু গৌৰৱ কঢ়িয়াই আনিবলৈ সক্ষম হোৱা উত্তৰ-পশ্চিম যোৰহাটৰ এলেংমৰাৰ অতি দৰিদ্ৰ পৰিয়ালৰ যুৱক বিশাল বৰাক কালি তেওঁৰ বাসগৃহত সম্বৰ্দ্ধনা জনোৱা হয়। বিশাল কালি নিশা যোৰহাটত উপস্থিত হোৱাৰ পাছতে স্থানীয় যুৱকসকল যোৰহাট ৰেল ষ্টেচনত উপস্থিত হৈ ঢোলে-দগৰে উষ্ম আদৰনি জনাই গৃহলৈ আদৰি আনে আৰু নিশাই তেওঁৰ বাসগৃহত স্থানীয় ৰাইজৰ লগতে কুহুমযোগনীয়া গাঁৱৰ নৱোদয় যুৱক সংঘ, আঞ্চলিক পঞ্চায়তৰ সভাপতি জিতুমণি বৰা, সমাজকৰ্মী তুলসী বৰাকে ধৰি শতাধিক ৰাইজ কেইবাজনো গন্যমান্য ব্যক্তি উপস্থিত হৈ ফুলাম গামোচাৰে সম্বদ্ধনা জনায়। বিশালৰ বাসগৃহত ৰাইজ সমবেত হোৱাত এক উৎসৱমুখৰ পৰিৱেশৰ সৃষ্টি হয়।
প্ৰেৰক সঞ্জীৱ হাজৰিকা