মহাবিদ্যালয় সপ্তাহ শিক্ষার্থীৰ প্রতিভা বিকাশৰ এখন মঞ্চ

নিয়মীয়া বাৰ্তা ১৩ ফেব্ৰুৱাৰীঃ গুৱাহাটী মহানগৰীৰ আগশাৰীৰ শিক্ষা প্রতিষ্ঠান দিছপুৰ মহাবিদ্যালয়ৰ বার্ষিক সপ্তাহৰ কালি সামৰণি পৰে৷ সপ্তাহজোৰা বিভিন্ন কার্যসূচীৰে অনুষ্ঠিত এই মহাবিদ্যালয় সপ্তাহৰ কালি বঁটা বিতৰণী আৰু মুকলি সভা অনুষ্ঠিত হয়৷ সভাত মুখ্য অতিথি হিচাপে উপস্থিত থাকে অসম সাহিত্য সভাৰ নৱনির্বাচিত সভাপতি কুলধৰ শইকীয়া৷ ভাষণ প্রসংগত তেওঁ মহাবিদ্যালয় সপ্তাহ শিক্ষার্থীসকলৰ শাৰীৰিক, বৌদ্ধিক, মানসিক তথা প্রতিভা বিকাশৰ এখন মঞ্চ বুলি মন্তব্য কৰে৷ মহাবিদ্যালয়ৰ অধ্যক্ষ ড০ অমৰ শইকীয়াৰ সভাপতিত্বত অনুষ্ঠিত মুকলি সভাত বিভিন্ন শিতানত বিজয়ীসকলক বঁটা প্রদান কৰা হয়৷ এই সভাতেই মহাবিদ্যালয়ৰ ২০২০ বর্ষৰ মিছ দিছপুৰিয়ান খিতাপ লাভ কৰা ছাত্র একতা সভাৰ সহঃ সাধাৰণ সম্পাদিকা পাংখী ভট্টকো বঁটা প্রদান কৰা হয়৷ সভাত দিছপুৰ মহাবিদ্যালয়ৰ ২০১৮–১৯ বর্ষৰ মুখপত্র দিছপুৰিয়ান উন্মোচন কৰা হয়৷