নিয়মীয়া বাৰ্তা, ১২ জুলাই : নগাঁৱৰ চামগুৰিষ্টিৰ অন্তৰ্গত ভীমৰগাঁওস্থিত শ্ৰীশ্ৰীশিৰডী সাইবাবা মন্দিত আজি পুৱাই উপস্থিত হয় ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মা ৷ শ্ৰীশ্ৰীশিৰডী সাইবাবা মন্দিৰত মুখ্যমন্ত্ৰীগৰাকী উপস্থিত হৈ প্ৰথমে পূজা অৰ্চনা আগবঢ়োৱাৰ লগতে মন্দিৰ পৰিচালনা সমিতিৰ লগত আলোচনাত মিলিত হয় ৷ পৰৱৰ্তী সময়ত নৱনিৰ্মিত অৱস্থাত থকা শ্ৰীশ্ৰীশিৰডী সাইবাবা পকী মন্দিৰটো পৰিদৰ্শন কৰাৰ লগতে মন্দিৰটোৰ নিৰ্মাণ কাৰ্যৰ বুজ ল’য়৷ লগতে মন্দিৰটো নিৰ্মাণ আৰু উন্নয়নৰ ক্ষেত্ৰত সহায় আৰু সহযোগ আগবঢ়োৱাৰ আশ্বাস প্ৰদান কৰে মুখ্যমন্ত্ৰীগৰাকীয়ে ৷ ভীমৰগাঁওস্থিত শ্ৰীশ্ৰীশিৰডী সাইবাবা মন্দিৰত মুখ্যমন্ত্ৰী ড০ হিমন্ত বিশ্ব শৰ্মা উপস্থিত হোৱা সময়ত প্ৰতিকূল বতৰকো নেওচি মন্দিৰ পৰিচালনা সমিতিৰ লগতে ভক্তপ্ৰাণ ৰাইজে গায়ন বায়নেৰে বিপুল আদৰণি জনায় ৷ আনহাতে বৰষুণত তিতি তিতি মুখ্যমন্ত্ৰীগৰাকীয়ে ৰাইজৰ সম্ভাষণ গ্ৰহণ কৰাৰ লগতে উপস্থিত ৰাইজৰ খা খবৰ লয় ৷ মুখ্যমন্ত্ৰীগৰাকী সাইবাবা মন্দিৰত উপস্থিত হোৱাৰ সময়ত ৰাজ্যসভাৰ সাংসদ পৱিত্ৰ মাৰ্ঘেৰিটা, বঢ়মপুৰৰ বিধায়ক জিতু গোস্বামী, সদৰ সমষ্টিৰ বিধায়ক ৰূপক শৰ্মা, কলিয়াবৰ জিলা বিজেপিৰ সভাপতি অনিল শইকীয়া, বাজিয়াগাঁও মণ্ডল বিজেপিৰ সভাপতি প্ৰানজিৎ বৰাকে ধৰি বিজেপিৰ বিষয়ববীয়াৰ লগতে শিৰডী সাইবাবা সেৱা ন্যাস নগাঁও পৰিচালন ন্যাসৰক্ষী দুৰ্লভ পৱল বৰুৱাকে ধৰি বহুকেইজন বিষয়ববীয়াৰ লগতে ভক্তসকল উপস্থিত থাকে ৷ সাইবাবা মন্দিৰটো পৰিৰ্দশন কৰাৰ অন্তত ভেৰভেৰীস্থিত মহামৃত্যুঞ্জয় মন্দিৰলৈ ৰাওনা হয় মুখ্যমন্ত্ৰীগৰাকী ৷
প্ৰেৰক প্ৰমোদ শৰ্মা