✅৫০সংখ্যক কার্বি যুৱ উৎসৱলৈ আমন্ত্রণ
✅জে পি নাড্ডাৰে লোকসভা নির্বাচনক লৈ আলোচনা
বিশেষ বাৰ্তা, ১৪ ডিচেম্বৰঃ কার্বি যুৱ উৎসৱত অংশগ্রহণৰ বাবে দেশৰ ৰাষ্ট্রপতি দ্রৌপদী মুৰ্মুক আমন্ত্রণ জনালে মুখ্যমন্ত্রী ডঃ হিমন্ত বিশ্ব শর্মাই৷ দিল্লী ভ্রমণৰত মুখ্যমন্ত্রী ডঃ শর্মাই আজি ৰাষ্ট্রপতি দ্রৌপদী মুর্মুক সাক্ষাৎ কৰে৷ ৰাষ্ট্রপতি ভৱনত হোৱা সাক্ষাতকালত মুখ্যমন্ত্রীজনে মুর্মুক অসম ভ্রমণৰ বাবে আমন্ত্রণ জনায়৷ উল্লেখ্য যে অহা বর্ষৰ জানুৱাৰী মাহৰ ১২ৰ পৰা ১৯ তাৰিখলৈ অনুষ্ঠিত হ’ব ৫০ সংখ্যক কার্বি যুৱ উৎসৱ৷ এই কার্বি যুৱ উৎসৱত মুখ্য অতিথি হিচাপে অংশ ল’বলৈ ডঃ শর্মাই ৰাষ্ট্রপতিগৰাকীক অনুৰোধ জনায়৷ মুখ্যমন্ত্রীগৰাকীয়ে কার্বি যুৱ উৎসৱ সন্দর্ভতো ৰাষ্ট্রপতি মুর্মুক সবিশেষ অৱগত কৰে৷ এনে এক অনুষ্ঠানত দেশৰ ৰাষ্ট্রপতিৰ উপস্থিতিয়ে নিঃসন্দেহে অনুষ্ঠানৰ সৌষ্ঠৱ বৃদ্ধি কৰিব বুলি পাছত এক বিবৃতিযোগে মুখ্যমন্ত্রী ডঃ শর্মাই মত ব্যক্ত কৰে৷ সামাজিক মাধ্যমত মুখ্যমন্ত্রী ড০ শর্মাই আজি এই কথা প্রকাশ কৰি এইবুলি উল্লেখ কৰে– ৰাষ্ট্রপতি দ্রৌপদী মুর্মুক সাক্ষাৎ কৰি আজি মই গর্বিত বোধ কৰিছো৷ তেওঁৰ নম্রতা আৰু মমতা আমাৰ সকলোৰে বাবে এক অপৰিসীম শক্তিৰ উৎস৷ তেওঁৰ পৰা লাভ কৰা মার্গ দর্শন মোৰ বাবে এক সৌভাগ্য বিষয়৷ ইফালে পুৱাৰ ভাগত ৰাষ্ট্রপতিক সাক্ষাত কৰা মুখ্যমন্ত্রীজনে আজি নিশাৰ ভাগত দেশৰ উপ ৰাষ্ট্রপতি জগদীপ ধনকৰকো সৌজন্যমূলক সাক্ষাত কৰে৷ আনহাতে মুখ্যমন্ত্রীজনে আজি সংসদভৱনত কেন্দ্রীয় সংসদীয় পৰিক্রমা আৰু কয়লা মন্ত্রী প্রহ্লাদ যোশী আৰু দলৰ ৰাষ্ট্রীয় সভাপতি জে পি নাড্ডাক সাক্ষাত কৰে৷ নাড্ডাৰ সৈতে হোৱা সৌজন্যমূলক সাক্ষাতত তিনিখন ৰাজ্যত অলপতে সম্পন্ন হৈ যোৱা বিধানসভা নির্বাচনত বিজেপিৰ সফলতাৰ বাবে মুখ্যমন্ত্রীয়ে তেওঁক অভিনন্দন জনায়৷ লগতে আগন্তুক লোকসভা নির্বাচনত অসমত কৰণীয় বিষয় সন্দর্ভত নাড্ডাই মুখ্যমন্ত্রীক পৰামর্শ প্রদান কৰে৷ কাইলৈ ৰাজস্থানৰ মুখ্যমন্ত্রী হিচাপে ভজনলাল শর্মাই শপত গ্রহণ কৰিবলগীয়া অনুষ্ঠানত অংশ গ্রহণ কৰিবলৈ ডঃ শর্মাই পুৱাৰ ভাগত জয়পুৰলৈ উৰা মাৰিব৷ সন্ধিয়া পুনৰ দিল্লীলৈ উভতি অহাৰ কথা মুখ্যমন্ত্রীজনৰ৷
#বাৰ্তা ডেস্ক