বাৰ্তা ডিজিটেল ডেস্ক, ৩ জানুৱাৰীঃ কেপটাউন টেষ্টত দক্ষিণ আফ্ৰিকাই ভাৰতৰ বিৰুদ্ধে প্ৰথম ইনিংছত মাত্ৰ ৫৫ ৰান সংগ্ৰহ কৰি অল আউট হৈছে। আফ্ৰিকান দলটোৱে মেচখনত এটা সম্পূৰ্ণ ছেছনো বেটিং কৰিব নোৱাৰিলে। মুঠ ৫৫ ৰানেৰে আফ্ৰিকাই ভাৰতৰ বিৰুদ্ধে টেষ্ট ক্ৰিকেটৰ এটা ইনিংছত সৰ্বনিম্ন মুঠ ৰান সংগ্ৰহ কৰাৰ লজ্জাজনক অভিলেখ গঢ়িবলৈ সক্ষম হয়। প্ৰথমখন টেষ্টত ভাৰতীয় বেগী বলাৰ মহম্মদ চিৰাজে ত্ৰাসৰ সৃষ্টি কৰি আফ্ৰিকান বেটিং লাইনআপক ধ্বংস কৰাত গুৰুত্বপূৰ্ণ অৱদান আগবঢ়াইছিল, যত চিৰাজে ৬টা উইকেট দখল কৰিছিল। ইয়াৰ পূৰ্বে নিউজিলেণ্ডে ভাৰতৰ বিৰুদ্ধে টেষ্টত সৰ্বনিম্ন স্কৰ কৰাৰ লজ্জাজনক অভিলেখ আছিল, যেতিয়া ২০২১ চনত ৱাংখেড়েত ভাৰতীয় দলৰ বিৰুদ্ধে কিৱি দলটোৱে ৬২ ৰান সংগ্ৰহ কৰি অল আউট হৈছিল। কিন্তু ভাৰতৰ সন্মুখত ৫৫ ৰানত অল আউট হৈ দক্ষিণ আফ্ৰিকাই নিজৰ নামত এই বেয়া অভিলেখ গঢ়িবলৈ সক্ষম হৈছে। কেৱল ভাৰতৰ বিৰুদ্ধে নহয়, মুঠ ৫৫ ৰান ঘৰুৱা মাটিত টেষ্ট ক্ৰিকেটত আফ্ৰিকাৰ বাবে সৰ্বনিম্ন ইনিংছ মুঠ আছিল। দুখন মেচৰ টেষ্ট শৃংখলাৰ প্ৰথমখন মেচত আয়োজক আফ্ৰিকাক বেটিঙত অতি শক্তিশালী দেখা গৈছিল যদিও দ্বিতীয়খন টেষ্টত ভাৰতীয় বলাৰৰ সন্মুখত দুৰ্বল অট্টালিকাৰ দৰে ভাঙি পৰিছিল। ভাৰতীয় বলাৰসকলে দক্ষিণ আফ্ৰিকাৰ বেটছমেনসকলৰ ওপৰত ক্ৰিকেট বল নহয়, জুইৰ বল নিক্ষেপ কৰিছিল। ইনিংছৰ আৰম্ভণিৰে পৰা ভাৰতে আফ্ৰিকাৰ ওপৰত ত্ৰাস সৃষ্টি ৰাখিছিল।