বাৰ্তা বুৰো, মৰিগাঁও, ১০ জানুৱাৰী : মৰিগাঁও জিলাত গৰুচুৰি ঘটনা বৃদ্ধি পোৱাৰ লগেলগে ক্ষোভিত ৰাইজে পুৱতি নিশা ধৰমতুলৰ বিহুবৰিত একাংশ স্থানীয় ৰাইজে এখন গৰু সৰবৰাহ কৰা বাহন জব্দ কৰি জ্বলাই দিয়াৰ লগতে চালক হেণ্ডিমেনকো উত্তম মধ্যম দিয়া ঘটনাই চাঞ্চল্য সৃষ্টি কৰিছে। প্ৰাপ্ত তথ্য অনুসৰি মৰিগাঁও ধৰমতুল সংযোগী পথৰ বিহুবড়ি ৰেলগেটত আজি পুৱতি নিশা এখন গৰু ভৰ্তি বাহন ৰৈ থকাৰ খবৰ লাভ কৰি অঞ্চলটোৰ কেইজনমান যুৱকে গাড়ীখন আগুচি ধৰি চালক-হেণ্ডিমেনক সোধাপোচা কৰে। সেই সময়তে উক্ত স্থানত এখন চুইফট বাহনৰে আহি উপস্থিত হোৱা যুৱক কেইজনমানে স্থানীয় যুৱকৰ দলটোক তিনি হাজাৰ টকাৰ বিনিময়ত বাহনখন এৰি দিবলৈ অনুৰোধ কৰে।তেতিয়াই স্থানীয় যুৱক কেইজনৰ চুৰি গৰু বুলি সন্দেহ ঘনীভূত হয় সমীপৰ আৰু গাঁওবাসীক চুৰি গৰু ধৰা বুলি খবৰ দিয়ে । তেতিয়া ৰাইজ হিলদল বান্ধি ওলাই অহাৰ উমান পাই চুইফট বাহনখনত অহা যুৱকৰ দলটো উক্ত স্থানৰ পৰা পলায়ন কৰে । আনহাতে ৰাইজে গৰু কঢ়িয়াই অনা বাহনখন জব্দ কৰি চালক হেণ্ডিমেনক সোধাপোচা কৰাত সঠিক উত্তৰ লাভ নকৰাত উত্তম মাধ্যম সোধায়। তেনে সময়তে একাংশ উত্তেজিত ৰাইজে বাহনখনৰ পৰা সাতটাকৈ গৰু নমাই পথাৰৰ মাজলৈ নি বাহনখন জ্বলাই দিয়ে। ইয়াকে লৈ উক্ত স্থানত উত্তপ্ত পৰিস্থিতি সৃষ্টি হয়। এনে সময়তে ঘটনাস্থলীত উপস্থিত হোৱা ধৰমতুল আৰক্ষী থানাৰ ভাৰপ্ৰাপ্ত বিষয়া সুৰজ টেৰম ৰ নেতৃত্বত আৰক্ষী দলে উত্তেজিত ৰাইজৰ মাজৰ পৰা বাহনখনৰ চালক হেণ্ডিমেনক উদ্ধাৰ কৰি ধৰমতুল আৰক্ষী থানালৈ স্থানান্তৰ কৰে।পৰৱৰ্তী সময়ত ঘটনাস্থলীত মৰিগাঁও অতিৰিক্ত আৰক্ষী অধীক্ষক ধ্ৰুৱজ্যোতি নাথৰ নেতৃত্বত আৰক্ষী বাহিনী উপস্থিত হৈ সমগ্ৰ ঘটনা নিয়ন্ত্ৰণ কৰাৰ লগতে অগ্নিনিৰ্বাপন বাহিনীৰ সহায়ত অগ্নিদগ্ধ হোৱা বাহনখনৰ জুই নিৰ্বাপন কৰিবলৈ সক্ষম হয়। আনহাতে মৰিগাঁও জিলাৰ ধৰমতুলৰ বিহুবৰিত চোৰাংকৈ গৰু সৰবৰাহ কৰা বুলি সন্দেহ কৰি উত্তম মধ্যম দিয়া বাহনখনৰ চালক দিলদাৰ হুছেইন আৰু হেণ্ডিমেন হাচমত আলিক আৰক্ষীয়ে উদ্ধাৰ কৰি চিকিৎসাৰ বাবে মৰিগাঁও অসামৰিক চিকিৎসলায়ত ভৰ্তি কৰে। আনহাতে গৰু সৰবৰাহ কৰা গাড়ীৰ চালক হেণ্ডিমেনে প্ৰকাশ কৰা মতে তেওঁলোকৰ গাড়ীৰে সৰবৰাহ কৰা সাতটাকৈ গৰু মৰিগাঁও চহৰৰ সমীপৱৰ্তী দলবাৰীৰ পৰা নেলীলৈ বুলি কঢ়িয়াই আনিছিল আৰু গৰুকেইটাৰ যাবতীয় নথি পত্ৰ থকা বুলি দাবী কৰিছে।
প্ৰেৰক প্ৰাঞ্জল দাস