অসম বাৰ্তাজীৱী সংঘৰ নৱনিৰ্বাচিত সভাপতি মধুসূদন মেধি
বাৰ্তা ডিজিটেল ডেস্ক, ১০ জানুৱাৰীঃ অসম বাৰ্তাজীৱী সংঘৰ নৱনিৰ্বাচিত সভাপতি মধুসূদন মেধিক আজি কামৰূপ জিলা তথ্য আৰু জনসংযোগ বিষয়া বিকাশ শৰ্মাই তেওঁৰ কাৰ্য্যালয়ত অনুষ্ঠিত এক আড়ম্বৰপূৰ্ণ সভাত সম্বৰ্ধনা জ্ঞাপন কৰে। জনসংযোগ বিষয়া শৰ্মাই মেধিক এখন ফুলাম গামোচা আৰু এখন পুথিৰে সম্বৰ্ধনা জনায়। অসম বাৰ্তাজীৱী সংঘৰ নৱনিৰ্বাচিত সভাপতি মধুসূদন মেধিক সম্বৰ্ধনা জ্ঞাপন কৰি শৰ্মাই মেধিক তেওঁৰ বলিষ্ঠ নেতৃত্বত অসমৰ সাংবাদিকসকলক সুসংগঠিত কৰি সাংবাদিকসকলৰ কল্যাণৰ বাবে কাম কৰি যাবলৈ আহ্বান জনায়। সম্বৰ্ধনা গ্ৰহণ কৰি অসম বাৰ্তাজীৱী সংঘৰ নৱনিৰ্বাচিত সভাপতি মধুসূদন মেধিয়ে সাংবাদিকসকলৰ কল্যাণৰ বাবে কাম কৰি যাবলৈ বদ্ধপৰিকৰ বুলি কয়। অনুষ্ঠানত জিলাখনৰ জ্যেষ্ঠ সাংবাদিক হিতেশ কলিতা,হিতেন মালী, মুনীন ডেকা, গোবিন্দ দাসৰ লগতে ভালেসংখ্যক সাংবাদিক আৰু জিলা তথ্য আৰু জনসংযোগ বিভাগৰ কাৰ্য্যালয়ৰ কৰ্মচাৰী সকল উপস্থিত থাকে।