🔹 ছ’চিয়েল মিডিয়াত ভাইৰেল ভিডিঅ’ : তীব্র চাঞ্চল্য
নিউজ ডেস্ক, ১২ আগষ্ট : চালকক বাছ ৰখাবলৈ অনুমতি দিয়া নাছিল কণ্ডাক্টৰে৷ হাত দাঙি বাছ ৰখাবলৈ এগৰাকী মহিলাই ইংগিত দিয়ে যদিও কণ্ডাক্টৰে গুৰুত্ব নিদিলে৷ ক্ষুব্ধ হৈ মহিলাগৰাকীয়ে বাছলৈ লক্ষ্য কৰি দলিয়ালে কাঁচৰ বটল৷ আনকি কণ্ডাক্টৰৰ গালৈ দলিয়ালে সাপ৷ এই ঘটনাক লৈ তীব্র আতংকৰ সৃষ্টি হয় বাছখনত৷ প্রত্যক্ষদর্শী যাত্রীসকলৰ অভিযোগ অনুসৰি, সুৰামত্ত অৱস্থাত আছিল মহিলাগৰাকী৷ মহিলাগৰাকীয়ে দলিওৱা বটল বাছৰ পিছফালৰ আইনাত লাগি সেই আইনা ভাঙি টুকুৰা–টুকুৰ হয়৷ অৱশেষত বাছ ৰখাবলৈ বাধ্য হয় চালকগৰাকী৷ এই ঘটনা সংঘটিত হৈছে হায়দৰাবাদত৷ বাছখন দিলখুছ নগৰলৈ গৈ আছিল৷ বিদ্যানগৰ ষ্টেণ্ড এৰাৰ পাছতে এনচিচি ৰোডৰ কাষত এগৰাকী মহিলাই বাছখন ৰখোৱাৰ বাবে হাত দাঙে৷ কিছুদূৰ আগবাঢ়ি গৈ বাছখন ৰখে৷ এই বিষয়টোক লৈয়ে ক্ষুব্ধ হৈ পৰে মহিলাগৰাকী৷ লগে লগে কাঁচৰ বটল দলিয়াই দিয়ে মহিলাগৰাকীয়ে৷ এনে অৱস্থাত বাছখনৰ পৰা নামি আহে কণ্ডাক্টৰ৷ মহিলাগৰাকীৰ সৈতে কণ্ডাক্টৰ আৰু অন্য যাত্রীসকলৰ বিষয়টোক লৈ সৃষ্টি হয় বাদানুবাদ৷ উত্তপ্ত পৰিস্থিতিৰ মাজতে মহিলাগৰাকীয়ে নিজৰ বেগৰ পৰা এডাল সাপ উলিয়াই কণ্ডাক্টৰৰ গালৈ দলিয়াই দিয়ে৷ এই ঘটনাক লৈ তীব্র আতংকৰ সৃষ্টি হয়৷ ভয়তে যাত্রীসকলে ঘটনাস্থলীৰ পৰা পলায়ন কৰিবলৈ লয়৷ অৱশ্যে কণ্ডাক্টৰজন কথমপি সর্পদংশনৰ পৰা ৰক্ষা পৰে৷ কণ্ডাক্টৰৰ গাৰ পৰা নামি গৈ সাপডালে পথৰ দাঁতিত থকা জংঘলত প্রৱেশ কৰে৷ এই ঘটনাক লৈ কণ্ডাক্টৰে আৰক্ষীক অভিযোগ দিছে যদিও আৰক্ষীয়ে তাৎক্ষণিকভাৱে মহিলাগৰাকীক গ্রেপ্তাৰ কৰা নাই৷ প্রত্যক্ষদর্শী যাত্রীসকলকো মহিলাগৰাকীয়ে অশ্রাব্য গালি–গালাজ কৰে৷ মহিলাগৰাকী সুৰামত্ত অৱস্থাত আছিল বুলি অভিযোগ অনা হৈছে বুলিও আৰক্ষীয়ে এই বিষয়টো সন্দর্ভত তদন্ত চলাব বুলি প্রতিশ্রুতিহে দিছে৷ ইতিমধ্যে এই ঘটনাৰ ভিডিঅ’ ভাইৰেল হৈ পৰিছে ছ’চিয়েল মিডিয়াত৷