🔹 প্রশিক্ষক গৌতম গম্ভীৰৰ দাবী মানি ল’লে ব’র্ডে
নিউজ ডেস্ক, ১৬ আগষ্ট : মুখ্য প্রশিক্ষক গৌতম গম্ভীৰৰ দাবী মানি ল’লে ভাৰতীয় ক্রিকেট নিয়ন্ত্রণ ব’র্ডে৷ দক্ষিণ আফ্রিকাৰ প্রাক্তন তাৰকা পেচ বলাৰ মৰ্নে মর্কেলক টীম ইণ্ডিয়াৰ নতুন বলিং প্রশিক্ষক হিচাপে নিযুক্তি দিয়া হৈছে৷ বাংলাদেশৰ বিপক্ষে খেলিবলগীয়া আসন্ন টেষ্ট শৃংখলাৰ পূর্বে দায়িত্বভাৰ গ্রহণ কৰিব মৰ্নে মর্কেলে৷ ভাৰতীয় ক্রিকেট নিয়ন্ত্রণ ব’ৰ্ডৰ সম্পাদক জয় শ্বাহে মৰ্নে মর্কেলৰ নিযুক্তিৰ বিষয়ে নিশ্চয়তা প্রদান কৰে৷ উল্লেখ্য যে ভাৰতীয় দলৰ বাকীসকল প্রশিক্ষকে শ্রীলংকা ভ্রমণৰ পূর্বে কার্যভাৰ গ্রহণ কৰিছিল যদিও মৰ্নে মর্কেলৰ নিযুক্তিৰ আনুষ্ঠানিকতা সম্পূর্ণ হোৱা নাছিল৷ ভাৰতীয় দলৰ বলিং প্রশিক্ষকৰ দায়িত্ব গ্রহণ কৰাৰ পূর্বে দক্ষিণ আফ্রিকাৰ প্রাক্তন পেচ বলাৰগৰাকীয়ে পাকিস্তান ক্রিকেট দলৰ বলিং প্রশিক্ষক হিচাপে কার্যনির্বাহ কৰিছিল৷ পূর্বতে লক্ষ্ণৌ ছুপাৰ জায়েণ্টছত গৌতম গম্ভীৰৰ সৈতে প্রশিক্ষকৰ দায়িত্বত আছিল মৰ্নে মর্কেল৷ গৌতম গম্ভীৰৰ সৈতে মৰ্নে মর্কেলে লক্ষ্ণৌ ছুপাৰ জায়েণ্টছত দুবছৰ কাম কৰিছিল৷