শ্ৰীমন্ত শংকৰদেৱ সংঘৰ পদাধিকাৰ ভবেন্দ্ৰ নাথ ডেকালৈ বৰ অসম সমন্বয় বঁটা

বিশেষ বাৰ্তা, ২৬ নৱেম্বৰঃ শ্ৰীমন্ত শংকৰদেৱ সংঘৰ পদাধিকাৰ ভবেন্দ্ৰ নাথ ডেকালৈ অসম জাতীয়তাবাদী যুৱ পৰিষদে এই বছৰ আগবঢ়াইছে বৰ অসম সমন্বয় বঁটা। অহা ৩০ নৱেম্বৰৰ পৰা লখিমপুৰ নগৰৰ ত্যাগ ক্ষেত্রত অনুষ্ঠিত হবলগীয়া পৰিষদৰ লখিমপুৰ জিলা সমিতিৰ অষ্টম দ্বিবাৰ্ষিক অধিবেশন আৰু ষষ্ঠ বাৰ্ষিক অসম দিৱসৰ তিনিদিনীয়া কাৰ্য্য সূচীৰ অসম দিৱসৰ দিনা বিশিষ্ট ব্যক্তি গৰাকীক এই বটা প্ৰদান কৰা হব। এই বটাত আছে গামোচা, চেলেং, জাপি, অংগবস্ত্ৰ, মান পত্ৰ, হেংডাং,স্মাৰক, আদি সহ নগদ ২৫ হেজাৰ টকা। উল্লেখ্য পৰিষদৰ এই বটা প্ৰদান কাৰ্য্যসূচীত লখিমপুৰ জিলা সাহিত্য সভায়ো পূৰ্বৰ পৰা সহযোগ কৰি আহিছে। জিলা সাহিত্য সভাৰ সহযোগত পৰিষদে বিগত কিছু বছৰৰ পৰা বৰ অসম সমন্বয় বটা প্ৰদান কৰি আহিছে। উল্লেখ্য এই অধিবেশন উপলক্ষে তিনিদিনীয়াকৈ বিভিন্ন প্ৰতিযোগিতা, মুকলি সভা, স্মৃতি গ্ৰন্থ উন্মোচন, সাংস্কৃতিক শোভাযাত্রা, বটা প্ৰদান, সাংস্কৃতিক অনুষ্ঠান আদি বিভিন্ন কাৰ্য্যসূচী গ্ৰহণ কৰা হৈছে। অন্তিম দিনাৰ সাংস্কৃতিক অনুষ্ঠানত সংগীতৰ লহৰ তুলিবলৈ আহিব শিল্পী কল্যাণদ্বীপ আৰু বিপিন চাওডাং। নৰ্থ লখিমপুৰ প্ৰেছ ক্লাবত আজি উদ্যোক্তাসকলে সংবাদ মেলযোগে এই কাৰ্য্য সূচীসমুহৰ লগতে বটাপ্ৰাপকজনৰ নাম ঘোষণা কৰে। সংবাদ মেলখনত পৰিষদৰ লখিমপুৰ জিলা সমিতিৰ সম্পাদক মোবিন আহমেদ, উত্তৰ লখিমপুৰ আঞ্চলিক সমিতিৰ সভাপতি মনোজ কলিতা, সম্পাদক ৰিংকু শইকীয়া, উদযাপন সমিতিৰ সভাপতি ড০ অমৰেন্দ্ৰ গগৈ, কাৰ্য্যকৰী সভাপতি দেবজিৎ মজুমদাৰ, জিলা সাহিত্য সভাৰ সভাপতি উমাকান্ত বৰুৱা আদিয়ে অংশগ্রহণ কৰি এই অনুষ্ঠানটো সফল কৰি তুলিবলৈ সকলোৰে সহযোগিতা কামনা কৰে।