নিয়মীয়া বাৰ্তা, ১৬ ডিচেম্বৰঃ ডিব্ৰুগড় জিলাৰ লাহোৱাল থানাৰ অন্তৰ্গত লাহোৱালৰ চেঁচা পুলত আজি পুৱতিনিশা সংঘটিত হয় এক ভয়ংকৰ দুঘটনা। দুৰ্ঘটনাটো ইমানেই ভয়াৱহ আছিল যে চলন্ত অৱস্থাতে দলঙৰ পৰা উফৰি নদীৰ বুকুত ভয়াৱহভাৱে সোমাই পৰে AS06AK 8716 নম্বৰৰ এখন বাহন। দুৰ্ঘটনাত ইতিমধ্যে এজন যুৱকৰ থিতাতে মৃত্যু হোৱা বুলি জানিব পৰা গৈছে। লগতে বাহনখনত থকা আন চাৰিজন লোকক উদ্ধাৰ কৰি সংকটজনক অৱস্থাত অসম চিকিৎসা মহাবিদ্যালয় হাস্পতাললৈ প্ৰেৰণ কৰিছে । মৃত যুৱকজন টেঙাখাত তামুলীখাতৰ ঈশান গগৈ। আনহাতে সংকটজনক অৱস্থাত চিকিৎসাধীন হৈ থকা আন চাৰিজন লোক ক্ৰমে অখিৰাজ গগৈ (২৮), ত্ৰিদীপ গগৈ (৩০), লাটু গগৈ (২৬) আৰু বিপ্লৱ গগৈ (২৮)৷ কেউজনে টেঙাখাত তামুলীখাটৰ পৰা ডিব্ৰুগড় বকুল মাজগাঁৱলৈ কইনা থ’বলৈ বৰযাত্ৰী হিচাপে আহিছিল ৷ কইনা থৈ নিজ গৃহলৈ বুলি উভতি যোৱা অৱস্থাতে এই ভয়াৱহ পথ দুৰ্ঘটনাটো সংঘটিত হোৱা বুলি আত্মীয় লোকৰ পৰা জানিব পৰা গৈছে। পুৱতিনিশা ঘন কুঁৱলীৰ বাবেই চেঁচা নদীৰ ওপৰত থকা দলঙৰ পৰা উফৰি অভিশপ্ত বাহনখন নদীৰ বুকুত পৰাৰ সন্দেহ কৰা হৈছে ৷ এই ভয়াবহ পথ দুৰ্ঘটনাৰ খৱৰে এতিয়া টেঙাখাত তামুলীখাতৰ লগতে সমগ্ৰ লাহোৱাল অঞ্চলতো এক শোকাকুল পৰিৱেশে বিৰাজ কৰিছে।
প্ৰেৰক কাঞ্চনজ্যোতি গোহাঁই