🔹 দেশপ্ৰেমমূলক ভাব জাগ্ৰতৰ উদ্দেশ্যে বৃহৎ বাইক ৰেলী
নিয়মীয়া বাৰ্তা, ২৫ জানুৱাৰী : বৰপেটা জিলাৰ নৱগঠিত মন্দিয়া বিধানসভা সমষ্টিৰ অন্তৰ্গত কলগাছিয়া ৰাজহ চক্ৰ ভিত্তিত গণৰাজ্য দিৱস উদযাপন উপলক্ষে গছপুলি ৰোপণ কাৰ্যসূচী ৰূপায়ণ কৰে। কাৰ্যসূচীৰ লগত সংগতি ৰাখি ৰাইজৰ মাজত দেশপ্ৰেমমূলক ভাব জাগ্ৰত হোৱাৰ উদ্দেশ্য আগত ৰাখি বৃহৎ বাইক ৰেলীৰ আয়োজন কৰে উদযাপন সমিতিয়ে। উল্লেখ্য যে কাইলৈ ২৬ জানুৱাৰী অৰ্থাৎ গণৰাজ্য দিৱস। কাইলৈ পুৱা ৯ বজাত কলগাছিয়া মিনি ষ্টেডিয়ামত ৰাজহুৱাভাৱে পতাকা উত্তোলন কাৰ্যসূচী ৰূপায়ণ কৰিব। তাৰ লগতে স্কুল, কলেজীয়া ছাত্ৰ-ছাত্ৰীৰ মাজত নৃত্য প্ৰতিযোগিতা, দেশপ্ৰেমমূলক গীত, ফলমূল বিতৰণ কৰাৰ লগতে দিনজোৰা বৰ্ণাঢ্য কাৰ্য্যক্ৰমণিকাৰে বিভিন্ন ধৰণৰ কাৰ্যসূচী অনুষ্ঠিত কৰা হ’ব। সেয়েহে গণৰাজ্য দিৱসৰ দিনা সকলোৰে মাজত শান্তি-সম্প্ৰীতি কঢ়িয়াই আনে তাৰ বাবে আহ্বান জনায় কলগাছিয়া ৰাজহ চক্ৰৰ চক্ৰ বিষয়া প্ৰাঞ্জল শৰ্মা বৰুৱাই। আজিৰ এই গাম্ভীৰ্য্যপূৰ্ণ অনুষ্ঠানত অংশগ্ৰহণ কৰে বৰপেটা জিলা AIUDF কমিটীৰ সাধাৰণ সম্পাদক খণ্ডকাৰ আশ্ৰাফুল মামুন, অসম লোকসেৱা আয়োগৰ প্ৰাক্তন সদস্য এম মোজাম্মেল হুছেইন, ৰূপসী ব্লক কংগ্ৰেছৰ সাধাৰণ সম্পাদক (প্ৰশাসনিক) ৰবিউল ৰছুল হক, যুৱ নেতা আজাদ হুছেইন, কলগাছিয়াৰ গাঁওপ্ৰধান ছাৰোৱাৰ উদ্দিন, খাৰবাল্লি গাঁৱৰ গাঁওপ্ৰধান ছাইদুল ইছলাম, কলগাছিয়া গাঁও পঞ্চায়তৰ প্ৰাক্তন সভাপতি বাবুল হুছেইন, নৱজ্যোতি মহাবিদ্যালয়ৰ অৱসৰপ্ৰাপ্ত অধ্যাপক ড° ছোৰমান আলী, সমাজসেৱক শাৰফান আলী, প্ৰবীণ সাংবাদিক আব্দুল হামিদ, যুৱ নেতা ইমদাদুল ইছলাম, কলগাছিয়া মণ্ডল কংগ্ৰেছৰ সভাপতি নুৰুল ইছলামকে আদি কৰি শতাধিক লোক উপস্থিত থাকে। লগতে আজিৰ কাৰ্যসূচীত বৃহত্তৰ কলগাছিয়া অঞ্চলৰ ৰাইজে অংশগ্ৰহণ কৰাত ভূয়সী প্ৰশংসা কৰে চক্ৰ বিষয়াগৰাকীয়ে।
প্ৰেৰক মফিদুল ইছলাম