🔹 ৰাজ্যৰ ক্রিকেটপ্রেমীৰ বাবে সুখবৰ
নিউজ ডেস্ক, ২৮ জানুৱাৰী : ৰাজ্যৰ ক্রিকেটপ্রেমীৰ বাবে সুখবৰ৷ কেইমাহমানৰ বিৰতিৰ পিছত আঘাতমুক্ত হৈ পুনৰ খেলপথাৰলৈ উভতিছে ৰিয়ান পৰাগ৷ ৰঞ্জি ট্ৰফীৰ জৰিয়তে ৰিয়ান খেলপথাৰলৈ প্রত্যাৱর্তনৰ বাবে সাজু হৈছে৷ ৩০ জানুৱাৰীৰ পৰা সৌৰাষ্ট্রৰ বিপক্ষে খেলিবলগীয়া ৰঞ্জি মেচখনৰ বাবে ঘোষিত অসম দলত স্থান লাভ কৰিছে ৰিয়ান পৰাগে৷ দললৈ ঘূৰি অহাৰ পিছত ৰিয়ানে এতিয়া পুনৰ অসম দলৰ নেতৃত্বও বহন কৰিব৷ ৰিয়ানৰ প্রত্যাৱর্তন স্বাভাৱিকতেই অসম দলৰ বাবে সকাহৰ খবৰ৷ এই ছিজনত অসম দলে এতিয়ালৈকে এখনো মেচত জয়ৰ মুখ দেখা নাই৷ এইপর্যন্ত ৬খন মেচত ৪খন ড্র খেলাৰ বিপৰীতে ২খন মেচত পৰাজিত হৈছে অসম৷ সৌৰাষ্ট্রৰ বিপক্ষে মেচৰ বাবে ঘোষিত অসম দলটো – ৰিয়ান পৰাগ (অধিনায়ক), ডেনিছ দাস (সহঃ অধিনায়ক), মুখতাৰ হুছেইন, মৃণ্ময় দত্ত, ৰাহুল সিং, দীপজ্যোতি শইকীয়া, পাৰভেজ মুছাৰফ, সুমিত গাড়িগাঁওকাৰ, ঋষভ দাস, অনুৰাগ তালুকদাৰ, অভিনৱ চৌধুৰী, শিৱশংকৰ ৰয়, আকাশ সেনগুপ্তা, প্রদ্যুন শইকীয়া আৰু অম্লানজ্যোতি দাস৷