নিয়মীয়া বাৰ্তা ডিজিটেল, ৮ ফেব্ৰুৱাৰীঃ দিল্লী বিধানসভা নিৰ্বাচনত বিজেপিয়ে বৃহৎ জয়ৰ দিশে আগবাঢ়িছে। ইয়াৰ ভিতৰত আটাইতকৈ ডাঙৰ খবৰ হৈছে দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱালৰ নিৰ্বাচনী পৰাজয় আৰু নিৰ্বাচনত তেওঁক পৰাস্ত কৰাজন হৈছে প্ৰৱেশ চাহিব সিং ভাৰ্মা। কংগ্ৰেছ নেতা সন্দীপ দীক্ষিতেও এই আসনৰ পৰা প্ৰতিদ্বন্দ্বিতা কৰিছিল। প্ৰৱেশ চাহিব সিং ভাৰ্মা দিল্লীৰ এটা বিশিষ্ট ৰাজনৈতিক পৰিয়ালৰ অন্তৰ্গত। বিজেপিৰ প্ৰাক্তন নেতা তথা প্ৰাক্তন মুখ্যমন্ত্ৰী চাহিব সিং ভাৰ্মাৰ পুত্ৰ। তেওঁৰ ককাক আজাদ সিঙে উত্তৰ দিল্লী পৌৰ নিগমৰ মেয়ৰ হিচাপে কাৰ্যনিৰ্বাহ কৰি আহিছে। ইয়াৰ উপৰি ২০১৩ চনৰ বিধানসভা নিৰ্বাচনৰ সময়ত তেওঁ বিজেপিৰ টিকটত মুণ্ডকা সমষ্টিৰ পৰাও প্ৰতিদ্বন্দ্বিতা আগবঢ়াইছে। ১৯৭৭ চনত জন্মগ্ৰহণ কৰা প্ৰৱেশ ভাৰ্মাই দিল্লী পাব্লিক স্কুল আৰ কে পুৰমৰ পৰা স্কুলীয়া শিক্ষা সমাপ্ত কৰি পিছলৈ দিল্লী বিশ্ববিদ্যালয়ৰ কিৰোৰী মাল কলেজৰ পৰা স্নাতক ডিগ্ৰী লাভ কৰে। ইয়াৰ পিছত তেওঁ ফ’ৰ স্কুল অৱ মেনেজমেণ্টৰ পৰা এম বি এ কৰে। ২০১৩ চনত তেওঁৰ ৰাজনীতিত প্ৰৱেশ আৰম্ভ হৈছিল, যেতিয়া তেওঁ মেহৰৌলী সমষ্টিক প্ৰতিনিধিত্ব কৰি দিল্লী বিধানসভাত জয়ী হৈছিল। সাংসদ হিচাপে থকা সময়ছোৱাত তেওঁ সংসদৰ সদস্যৰ দৰমহা আৰু ভাট্টা সম্পৰ্কীয় যুটীয়া সমিতিৰ সদস্য হিচাপে কাম কৰি আহিছে। তেওঁ নগৰ উন্নয়নৰ স্থায়ী সমিতিত কাম কৰি আহিছে। ২০২৫ চনৰ দিল্লী নিৰ্বাচনৰ পূৰ্বে প্ৰৱেশ ভাৰ্মাই বৰ্তমানৰ আপ প্ৰশাসনক প্ৰাথমিক প্ৰতিশ্ৰুতি পূৰণ নকৰাৰ সমালোচনা কৰি “কেজৰিৱাল হটাও, দেশ বচাও” নামেৰে এক প্ৰচাৰ চলাইছিল। প্ৰচাৰ অভিযানত তেওঁ দিল্লী চৰকাৰক তীব্ৰ সমালোচনা কৰে। ইয়াৰ সময়ত তেওঁ প্ৰদূষণ সম্পৰ্কীয় উদ্বেগ, মহিলাৰ সুৰক্ষা আৰু নাগৰিক আন্তঃগাঁথনিৰ উন্নয়নৰ বিষয়সমূহ উত্থাপন কৰে। তেওঁ যমুনা চাফা কৰাৰ বিষয়টোও উত্থাপন কৰে। প্ৰৱেশ ভাৰ্মাৰো চোকা বক্তব্যৰ বাবে অহৰহ চৰ্চা অব্যাহত আছে। ২০১৯ চনত নাগৰিকত্ব সংশোধনী আইনৰ বিৰুদ্ধে প্ৰতিবাদৰ সময়ত তেওঁ প্ৰতিবাদকাৰীৰ বিৰুদ্ধে কঠোৰ মন্তব্য কৰিছিল। ২০২২ চনত তেওঁ এটা বিশেষ সম্প্ৰদায়ৰ ব্যৱসায় বৰ্জনৰ আহ্বান জনাইছিল, তাৰ পিছত বিতৰ্কৰ সৃষ্টি হৈছিল। একে সময়তে ২০২৩ চনত ছঠ পূজাৰ আগতে তেওঁৰ এটা ভিডিঅ’ ভাইৰেল হৈছিল, এই ভিডিঅ’টোত তেওঁ এজন চৰকাৰী বিষয়াৰ সৈতে কাজিয়া কৰিছিল। তেওঁ নিজৰ চাহিব সিং ভাৰ্মাৰ আদৰ্শ অনুসৰণ কৰি ৰাজনীতিত আগবাঢ়িছে। ৰাজনৈতিক যাত্ৰাত তেওঁ দিল্লীৰ ৰাজনীতিত এক গুৰুত্বপূৰ্ণ স্থান অৰ্জন কৰিছে। এই মুহূৰ্তত সকলোৰে চকু তেওঁৰ ওপৰত নিবদ্ধ।