নিয়মীয়া বার্তা, ১৬ মার্চঃ ক’ৰোনা ভাইৰাছৰ সম্ভাব্য প্রাদুর্ভাৱ ৰোধ কৰাৰ স্বার্থত সাময়িকভাৱে পিছুৱাই দিয়া হৈছে ধুবুৰীৰ ঐতিহ্যমণ্ডিত অশোকাষ্টমী মেলা ৷ ধুবুৰী মেলা পৰিচালনা কমিটীৰ সম্পাদক গণেশ সেনে সদৰী কৰা অনুসৰি, স্থানীয় ‘মেলা ময়দান’ত অহা ১ এপ্রিলৰ পৰা অনুষ্ঠিত হ’বলগীয়া মেলাখন সাৱধানতামূলক পদক্ষেপ ৰূপে জিলা প্রশাসনে অহা ১৫ এপ্রিললৈকে সাময়িকভাৱে স্থগিত ৰখাৰ নির্দেশ দিছে ৷ উল্লেখ্য যে এইবেলি ৫২ বছৰত ভৰি দিবলগীয়া ১৫দিনীয়া এই অশোকাষ্টমী মেলাখনলৈ কেৱল ধুবুৰী জিলাৰেই নহয়, ৰাজ্যৰ ভিন্ন প্রান্তৰ লগতে চুবুৰীয়া পশ্চিমবংগৰ পৰাও মেলাখন চাবলৈ অলেখ লোকৰ সমাগম ঘটে ৷ অৱশ্যে মেলাখন সাময়িকভাৱে স্থগিত ৰখা হ’লেও প্রতিবছৰৰ দৰে এইবাৰো মেলাথলীত আয়োজিত হৈ অহা বাসন্তী পূজাৰ কার্যসূচী যথা সময়তে অনুষ্ঠিত হ’ব বুলিয়েই প্রকাশ ৷ উল্লেখ্য যে ধুবুৰী পৌৰসভাৰ তদানীন্তন অধ্যক্ষ তথা প্রখ্যাত অধিবক্তা প্রয়াত কমল দে’ বক্সিৰ উদ্যোগত ১৯৬১ চনত প্রথমবাৰৰ বাবে ধুবুৰীৰ এই অশোকাষ্টমী মেলাখন আৰম্ভ হৈছিল ৷