নিয়মীয়া বাৰ্তা, ২ এপ্ৰিলঃ অখিল ভাৰতীয় বিদ্যাৰ্থী পৰিষদৰ ধুবুৰী নগৰ শাখা, ৰাষ্ট্ৰীয় কলা মঞ্চৰ উদ্যোগত আৰু ভোলানাথ মহাবিদ্যালয় (IQAC)’ৰ সহযোগত আয়োজিত হোৱা বিহু নৃত্য আৰু বিহু বাদ্যৰ কৰ্মশালাখনৰ সমাপণ ঘটে। সেই উপলক্ষে ধুবুৰী চহৰৰ মাজমজিয়াৰ ৰজা প্ৰভাত চন্দ্ৰ বৰুৱা খেলপথাৰত আয়োজিত হয় এক বিশেষ অনুষ্ঠানো। উক্ত কাৰ্যসূচীত ভোলানাথ মহাবিদ্যালয়ৰ অধ্যক্ষ ডঃ কিশোৰ কুমাৰ শ্বাহ, ধুবুৰী চক্ৰ বিষয়া, বিশিষ্ট নৃত্যশিল্পী ইৰিকা ইনগ্ৰিড নন্দীকে ধৰি স্থানীয় মান্যগণ্য ব্যক্তি আৰু অখিল ভাৰতীয় বিদ্যাৰ্থী পৰিষদৰ জিলা প্ৰমুখকে ধৰি ছাত্ৰ সংগঠনটোৰ ধুবুৰী নগৰৰ কাৰ্যকৰ্তাসকল উপস্থিত আছিল। উক্ত কাৰ্যসূচীতেই বিহু কৰ্মশালাটোৰ প্ৰশীক্ষক তথা বিশিষ্ট বিহুৱা ৰূপম শৰ্মাৰ নেতৃত্বত প্ৰশীক্ষণ লোৱা নাচনিসকলে পৰিবেশন কৰা বিহু নৃত্যই উপস্থিত সকলোৰে মন মুহিবলৈ সক্ষম হয়। পোনপ্ৰথমবাৰৰ বাবে ধুবুৰীৰ ভোলানাথ মহাবিদ্যালয়ত অনুষ্ঠিত হোৱা বহল পৰিৱেশৰ এই ৬দিনীয়া কৰ্মশালাটোত মুঠ ১৫৬ গৰাকী প্ৰশিক্ষাৰ্থীয়ে অংশ লৈছিল।
প্ৰেৰক অমিতাভ চক্ৰৱৰ্তী