ভাৰতৰ প্ৰতিৱেশী দেশ নেপালত শীঘ্ৰেই নিৰ্বাচনী প্ৰক্ৰিয়া আৰম্ভ হ’ব। অহা ৫ মাৰ্চত নেপালত সংসদীয় নিৰ্বাচন অনুষ্ঠিত হ’ব। নিৰ্বাচন শান্তিপূৰ্ণভাৱে অনুষ্ঠিত কৰাৰ লক্ষ্যৰে ভাৰত আৰু নেপালৰ মাজত ৭২ ঘণ্টাৰ বাবে সীমান্ত বন্ধ ৰাখিবলৈ দুয়ো দেশৰ মাজত বুজাবুজি হৈছে।
শুক্ৰবাৰে (৭ ফেব্ৰুৱাৰী) ভাৰতীয় সশস্ত্ৰ সীমা বল (SSB) আৰু নেপাল সশস্ত্ৰ আৰক্ষী বল (APF)-ৰ মাজত ডিআইজি পৰ্যায়ৰ এখন গুৰুত্বপূৰ্ণ বৈঠক অনুষ্ঠিত হয়। বৈঠকত নিৰ্বাচনৰ সময়ত কোনো ধৰণৰ বিঘ্ন সৃষ্টি কৰিব পৰা অনুপ্ৰৱেশকাৰীক ৰোধ কৰিবলৈ সীমান্তত নিৰাপত্তা ব্যৱস্থা অধিক কঠোৰ কৰাৰ বিষয়ে আলোচনা হয়।
বিশেষ সূত্ৰৰ মতে নেপালে নিৰ্বাচনৰ দুদিন পূৰ্বে সীমান্ত পোষ্ট বন্ধ কৰাৰ অনুৰোধ জনাইছিল আৰু ভাৰতীয় পক্ষই এই প্ৰস্তাৱত সন্মতি প্ৰকাশ কৰে। চুক্তি অনুসৰি, নিৰ্বাচনৰ দিনকে ধৰি মুঠ তিনি দিন অৰ্থাৎ ৭২ ঘণ্টা ভাৰত–নেপাল সীমান্ত পোষ্ট বন্ধ থাকিব।
উল্লেখ্য যে নিৰ্বাচনৰ পূৰ্বে ভাৰত আৰু নেপালৰ সীমান্ত বন্ধ ৰখাটো এক পুৰণি প্ৰথা। নিৰ্বাচনৰ সময়ত ভোটকেন্দ্ৰসমূহত বৃহৎসংখ্যাত নিৰাপত্তা বাহিনী নিয়োজিত থাকে। সেই পৰিপ্ৰেক্ষিততে সীমান্তত নিৰাপত্তা শক্তিশালী কৰা আৰু অনুপ্ৰৱেশ ৰোধ কৰাটো অতি প্ৰয়োজনীয়।
বৈঠকখনত সীমান্ত সুৰক্ষা, সীমান্ত অতিক্ৰম কৰি সংঘটিত অপৰাধ নিয়ন্ত্ৰণ, তৃতীয় দেশৰ নাগৰিকৰ অবৈধ যাতায়াত ৰোধ, মানৱ সৰবৰাহ, নকল নোট, ড্ৰাগছ সৰবৰাহ আৰু চোৰাং ব্যৱসায় সন্দৰ্ভতো আলোচনা কৰা হয়। লগতে ভাৰতীয় পক্ষই নেপালৰ মুক্ত সীমান্তৰ সুবিধা লৈ পাকিস্তানী আৰু কাশ্মীৰী উগ্ৰপন্থীয়ে অনুপ্ৰৱেশ কৰাৰ সম্ভাৱনাক লৈ উদ্বেগ প্ৰকাশ কৰে।
তথ্য অনুসৰি, বৈঠকত সীমান্ত গেটৰ সুৰক্ষা, দুয়ো দেশৰ নাগৰিকৰ যাতায়াত সহজ কৰা, জৰুৰী পৰিস্থিতিত উদ্ধাৰ ব্যৱস্থা আদিৰ ওপৰতো আলোচনা হয়। ইয়াৰ উপৰিও সীমান্ত স্তম্ভৰ সুৰক্ষা, দুৰ্যোগ মোকাবিলা অনুশীলন আৰু যৌথ ক্ৰীড়া কাৰ্যসূচী আয়োজনৰ বিষয়েও দুয়ো পক্ষই মত বিনিময় কৰে।
উল্লেখযোগ্য যে, ভাৰত চৰকাৰে বহু সময়ত নেপাল–ভাৰতৰ মুক্ত সীমান্ত ব্যৱহাৰ কৰি সন্ত্ৰাসবাদী অনুপ্ৰৱেশৰ আশংকা ব্যক্ত কৰি আহিছে। এই সিদ্ধান্তৰ জৰিয়তে নিৰ্বাচনৰ সময়ত দুয়ো দেশৰ সীমান্ত সুৰক্ষা অধিক শক্তিশালী হ’ব বুলি আশা কৰা হৈছে।
ডিজিটেল ডেস্ক, ৯ ফেব্ৰুৱাৰী