চলিত টি–২০ বিশ্বকাপৰ ছেমিফাইনেলত প্রৱেশ কৰিব পাৰিবনে ভাৰত? ছুপাৰ এইটৰ প্রথমখন মেচত দক্ষিণ আফ্রিকাৰ হাতত ৭৬ ৰানৰ পৰাজয়ৰ পিছতে সূর্যকুমাৰ যাদৱৰ সন্মুখত এয়া হৈছে ডাঙৰ প্রশ্ন৷
ৱেষ্ট ইণ্ডিজে জিম্বাব’ৱেক ১০৭ ৰানত পৰাস্ত কৰাৰ লগে লগে সমীকৰণটো অধিক জটিল হৈ পৰিছে৷ অৱশ্যে ডিফেণ্ডিং চেম্পিয়ন ভাৰতে ছেমিত প্রৱেশৰ সম্ভাৱনা এতিয়াই শেষ হৈ যোৱা নাই৷ বৃহস্পতিবাৰে জিম্বাব’ৱে আৰু দেওবাৰে ৱেষ্ট হণ্ডিজৰ বিৰুদ্ধে মুখামুখি হ’ব ভাৰত৷ এই দুখন মেচত জয়ী হ’লে ছেমিত প্রৱেশৰ সম্ভাৱনা বৃদ্ধি পাব ভাৰতীয় দলটোৰ৷
একে সময়তে যদি জিম্বাব’ৱে আৰু ৱেষ্ট ইণ্ডিজে বাকী দুখন মেচত দক্ষিণ আফ্রিকা আৰু ভাৰতৰ হাতত পৰাস্ত হয়, তেন্তে পইণ্টৰ ক্ষেত্রত ভাৰতে পোনপটীয়াকৈ অন্তিম চাৰিত প্রৱেশ কৰিব৷ যদি জিম্বাব’ৱে বাকী দুখন মেচত পৰাস্ত হয়, বাকী দুখন মেচত ভাৰত জয়ী হয় আৰু দক্ষিণ আফ্রিকাই ৱেষ্ট ইণ্ডিজৰ হাতত পৰাস্ত হয় তেন্তে নেট ৰান ৰেট গুৰুত্বপূর্ণ হ’ব৷
কাৰণ সেইক্ষেত্রত ভাৰত, দক্ষিণ আফ্রিকা আৰু ৱেষ্ট ইণ্ডিজৰ ৪ পইণ্ট থাকিব৷ নেট ৰান ৰেটৰ ওপৰত ভিত্তি কৰি প্রথম দুটা দলে ছেমিফাইনেলৰ টিকট লাভ কৰিব৷ সোমবাৰে ৱেষ্ট ইণ্ডিজ–জিম্বাব’ৱেৰ খেলখনৰ পিছত নেট ৰান ৰেটৰ ক্ষেত্রত ছুপাৰ এহট গ্রুপ ৱানৰ শীর্ষত থাকিব ৱেষ্ট ইণ্ডিজ৷ দক্ষিণ আফ্রিকাৰ দৰেই ৱেষ্ট ইণ্ডিজেও ১খন মেচত জয়লাভ কৰি ২ পইণ্ট লাভ কৰি আছে৷
অৱশ্যে ৱেষ্ট ইণ্ডিজৰ নেট ৰান ৰেট ৫.৩৫০৷ দক্ষিণ আফ্রিকাৰ ৩.৮০০৷ ভাৰত আৰু জিম্বাব’ৱেই এতিয়ালৈকে কোনো পইণ্ট সংগ্রহ কৰিবলৈ সক্ষম হোৱা নাই৷ ভাৰতৰ নেট ৰান ৰেট -৩.৮০০ আৰু জিম্বাব’ৱেৰ -৫.৩৫০৷ জিম্বাব’ৱেৰ বিৰুদ্ধে খেলখনত নেট ৰান ৰেট উন্নত কৰাৰ বাবে সর্বোত্তম সুযোগ হিচাপে বিবেচিত হৈছে ভাৰতীয় দলটোৰ বাবে৷
গতিকে, বৃহস্পতিবাৰে কেৱল জয়ী হ’লেই যথেষ্ট নহ’ব৷ নেট ৰান ৰেটৰ ব্যৱধান বৃদ্ধি কৰিবলৈ ভাৰতে ছিকন্দৰ ৰাজা বাহিনীক ১০০ বা তাতকৈ অধিক ৰানত পৰাস্ত কৰিব লাগিব৷ যদিহে ভাৰতে প্রথমে বেটিং কৰি ২২০ ৰান কৰে তেন্তে জিম্বাব’ৱেক ১২০ বা তাতকৈ কম ৰানত অল আউট কৰিব লাগিব৷ তেতিয়া দক্ষিণ আফ্রিকাক নেট ৰান ৰেটৰ ওপৰত হেঁচা প্রয়োগ কৰিবলৈ সক্ষম হ’ব৷
ডিজিটেল ডেস্ক, ২৪ ফেব্রুৱাৰী