বিধানসভা নির্বাচনৰ পিছতেই হঠাৎ অসম জাতীয় পৰিষদ দল ত্যাগ কৰিলে প্রাক্তন কেন্দ্রীয় মন্ত্রী ৰাজেন গোহাঁয়ে৷ সভাপতি লুৰিণজ্যোতি গগৈলৈ পদত্যাগ–পত্র প্রেৰণ কৰা ৰাজেন গোহাঁয়ে ব্যক্তিগত কাৰণত দল ত্যাগ কৰা বুলি উল্লেখ কৰিছে পত্রত৷
উল্লেখ্য যে সদ্যসমাপ্ত বিধানসভা নির্বাচনত অসম জাতীয় পৰিষদৰ পৰা বঢ়মপুৰ সমষ্টিত প্রতিদ্বন্দ্বিতা কৰা ৰাজেন গোহাঁইৰ বিজেপি প্রার্থী জিতু গোস্বামীৰ হাতত শোচনীয়ভাৱে পৰাজয় হৈছে৷ নির্বাচনত পৰাজিত হোৱাৰ পিছতে জাতীয়তাবাদে আমুৱা ৰাজেন গোহাঁয়ে বিজেপিলৈ অহাৰ সম্ভাৱনীয়তা ৰাখি পদত্যাগ কৰা বুলি চর্চা চলিছে৷
বিগত সময়ছোৱাত বিজেপিৰ প্রাক্তন কর্মীসকলক সংগঠিত কৰি নিজকে এক শক্তিত পৰিণত কৰিব খোজা ৰাজেন গোহাঁয়ে নির্বাচনৰ প্রাক্ক্ষণত অসম জাতীয় পৰিষদত যোগদান কৰিছিল৷ ৰাষ্ট্রীয়তাবাদৰ পৰা হঠাৎ জাতীয়তাবাদী হৈ উঠা ৰাজেন গোহাঁয়ে নির্বাচনত মুখথেকেচা খোৱাৰ পিছতেই সিদ্ধান্ত সলনি কৰে৷
ইফালে, নির্বাচনৰ ফলাফলৰ পিছতে বঢ়মপুৰৰ বিধায়ক জিতু গোস্বামীয়ে ৰাজেন গোহাঁইক তেওঁৰ ৰাজনৈতিক গুৰু বুলি অভিহিত কৰি পুনৰ বিজেপিলৈ আহিবলৈ আহ্বান জনাইছিল৷ আনকি এইক্ষেত্রত ৰাজেন গোহাঁইক সহায় কৰিম বুলিও ঘোষণা কৰিছিল৷
ৰাজেন গোহাঁয়ে পদত্যাগ কৰাৰ পিছত চর্চালৈ আহিছে বিজেপিত যোগদানৰ সম্ভাৱনীয়তাৰ কথা৷ স্মর্তব্য যে ৰাজেন গোহাঁইৰ পুত্র নৱাৰুণ গোহাঁই বর্তমান ৰাজ্যিক বিজেপিৰ সম্পাদকৰ দায়িত্বত আছে৷ নগাঁও লোকসভা সমষ্টিৰ পৰা চাৰিবাৰ সাংসদ হোৱাৰ লগতে কেন্দ্রীয় চৰকাৰৰ ৰাজ্যিক ৰে’লমন্ত্রী হিচাপে এসময়ত দায়িত্ব লাভ কৰা ৰাজেন গোহাঁয়ে ৰাজ্যিক বিজেপিৰো সভাপতি আছিল৷
কিন্তু বিগত ২০২৪ চনত বিজেপিৰ নেতৃত্বৰ প্রতি ক্ষোভ প্রকাশ কৰি দল এৰিছিল ৰাজেন গোহাঁয়ে৷ পদত্যাগ–পত্র দাখিলৰ পিছত ৰাজেন গোহাঁইৰ পৰৱর্তী পদক্ষেপ কি হ’ব, সেয়া এতিয়াও নিশ্চিত হোৱা নাই৷
বিশেষ বার্তা, নগাঁও, ১৯ মে’