এক বিশ্বাসযোগ্য তথ্যৰ ভিত্তিত অসম আৰক্ষীৰ নগাঁও থানাৰ এটা দলে ৰাঙলু আৰক্ষী চকীৰ অন্তৰ্গত বৰকুণ্ডলি মিকিৰপাৰ অঞ্চলত বিশেষ অভিযান চলায়। অভিযান চলাকালীন সময়ত পাঁচজন সন্দেহযুক্ত লোক ঘটনাস্থলীৰ পৰা পলাই যাবলৈ সক্ষম হয়।
আৰক্ষীৰ দাবী অনুসৰি, আন এজন সন্দেহযুক্তই গ্ৰেপ্তাৰৰ পৰা বাচিবলৈ আৰক্ষী দলটোৰ ওপৰত গুলীচালনা কৰে। ইয়াৰ পিছতে আৰক্ষীয়ে আত্মৰক্ষাৰ বৈধ অধিকাৰ প্ৰয়োগ কৰি নিয়ন্ত্ৰিত গুলীচালনাৰে প্ৰত্যুত্তৰ দিয়ে, যাৰ ফলত সন্দেহযুক্তজন গুলীবিদ্ধ হয়।
গুলীবিদ্ধ লোকজনক তৎক্ষণাত নগাঁও মেডিকেল কলেজ হাস্পতাললৈ স্থানান্তৰ কৰা হয় যদিও চিকিৎসকে তেওঁক মৃত বুলি ঘোষণা কৰে।
মৃত লোকজনক খাইৰুল আলী বুলি চিনাক্ত কৰা হৈছে। আৰক্ষীৰ মতে, তেওঁ প্ৰায় এমাহ পূৰ্বে সংঘটিত মৰিকলং ডকাইতি গোচৰৰ মূল অভিযুক্ত আছিল। ঘটনাস্থলীৰ পৰা এটা ৭.৬৫ এম এম পিষ্টল আৰু দুটা খালী কাৰ্টিজ উদ্ধাৰ কৰি জব্দ কৰা হৈছে।
আৰক্ষীৰ তথ্য অনুসৰি, খাইৰুল আলী পূৰ্বেও নগাঁও আৰু লখিমপুৰ জিলাৰ একাধিক ডকাইতি আৰু লুণ্ঠন গোচৰত জড়িত আছিল। ঘটনাটোক কেন্দ্ৰ কৰি অঞ্চলজুৰি তীব্ৰ চাঞ্চল্যৰ সৃষ্টি হৈছে।
ডিজিটেল ডেস্ক, ২৬ মে’