ফিফা বিশ্বকাপ ২০২৬ত ৪৮খন দেশৰ অংশগ্ৰহণৰ মাজতে সহঃ আয়োজক মেক্সিকোৱে দক্ষিণ কোৰিয়াক ১-০ গ’লত পৰাস্ত কৰি শেষ ৩২ত স্থান নিশ্চিত কৰা প্ৰথম দল হিচাপে পৰিগণিত হৈছে। বৃহস্পতিবাৰে গুৱাডালাহাৰাৰ এষ্টাডিঅ’ আকৰ’ন ষ্টেডিয়ামত অনুষ্ঠিত গ্ৰুপ ‘এ’ৰ খেলখনত মেক্সিকোৱে দ্বিতীয় একেৰাহে জয় সাব্যস্ত কৰে।
পূৰ্বৱৰ্তী কাটাৰ বিশ্বকাপত গ্ৰুপ পৰ্যায়ৰ পৰা বিদায় লোৱা মেক্সিকোৱে এইবাৰ ঘৰুৱা সমৰ্থনৰ মাজত পুনৰ শক্তিশালী প্ৰত্যাৱৰ্তন ঘটাইছে। ৫০ মিনিটত লুইছ ৰ’মোৱে খেলখনৰ একমাত্ৰ গ’লটো দিয়ে।
৮৭ মিনিটত দক্ষিণ কোৰিয়াই সমতা স্থাপনৰ সুবৰ্ণ সুযোগ লাভ কৰিছিল। চো গুৱে-ছুংৰ হেডাৰ মেক্সিকোৰ গ’লৰক্ষক ৰাউল ৰেংগেলে কষ্টৰে ৰক্ষা কৰে। ইয়াৰ পিছত ৰিবাউণ্ডত ইয়াং হিউন-জুনৰ শ্বটটোও তেওঁ অসাধাৰণভাৱে বাধা দি দলটোক জয় উপহাৰ দিয়ে।
খেলৰ পিছত মেক্সিকোৰ মুখ্য প্ৰশিক্ষক হাভিয়েৰ আগুইৰে কয়, “আমি এতিয়ালৈ যথেষ্ট ভাল খেল প্ৰদৰ্শন কৰি আহিছোঁ। যদিও এইখন আমাৰ শ্ৰেষ্ঠ খেল নাছিল, প্ৰতিদ্বন্দ্বী দলটোৱে আমাক বেছি সুযোগ নিদিলে। তথাপিও আমি তেওঁলোকৰ ভুলৰ সুযোগ লৈ গ’ল কৰিবলৈ সক্ষম হ’লোঁ আৰু আন দুই-এটা সুযোগো সৃষ্টি কৰিছিলোঁ।”
এই জয়েৰে মেক্সিকোৱে ফিফা বিশ্বকাপ ২০২৬ৰ শীৰ্ষ-৩২ পৰ্যায়ত প্ৰৱেশ নিশ্চিত কৰা প্ৰথম দল হিচাপে ইতিহাস ৰচনা কৰিলে।
ডিজিটেল ডেস্ক, ১৯ জুন