ভাৰতীয় ক্ৰিকেটে লাভ কৰিলে আন এজন উদীয়মান তাৰকা। মাত্ৰ ১৫ বছৰ বয়সতে বৈভৱ সূৰ্যবংশীয়ে জিম্বাবুৱেৰ বিৰুদ্ধে টি–২০ আন্তঃৰাষ্ট্ৰীয় শৃংখলাত দাঙি ধৰা অসাধাৰণ প্ৰদৰ্শনে বিশ্বজুৰি ক্ৰিকেটপ্ৰেমীৰ দৃষ্টি আকৰ্ষণ কৰিছে। তিনিখন মেচৰ শৃংখলাত তেওঁ ১৯৬.১০ ষ্ট্ৰাইক ৰেটত মুঠ ১৫১ ৰান সংগ্ৰহ কৰি সৰ্বাধিক ৰান সংগ্ৰাহক হিচাপে পৰিগণিত হয়। এই উজ্জ্বল প্ৰদৰ্শনৰ বাবে তেওঁ ‘প্লেয়াৰ অৱ দ্য ছিৰিজ’ সন্মান লাভ কৰে। ভাৰতে ৩–০ ব্যৱধানত শৃংখলা ক্লীন ছুইপ কৰাত বৈভৱৰ অৱদান আছিল আটাইতকৈ গুৰুত্বপূৰ্ণ। এই ভ্ৰমণকালত তেওঁ কেইবাটাও নজিৰ গঢ়ি তোলে, যিবোৰ ক্ৰিকেট ইতিহাসত বহুদিনলৈ স্মৰণীয় হৈ থাকিব।
শৃংখলাৰ প্ৰথমখন মেচতেই বৈভৱ সূৰ্যবংশীয়ে ইতিহাস ৰচনা কৰে। মাত্ৰ ১৫ বছৰ ১১৮ দিন বয়সত তেওঁ প্ৰথম আন্তঃৰাষ্ট্ৰীয় অৰ্ধশতক অৰ্জন কৰি বিশ্বৰ সৰ্বকনিষ্ঠ ক্ৰিকেটাৰ হিচাপে এই কৃতিত্ব লাভ কৰে। ইয়াৰ পূৰ্বে এই অভিলেখ নেপালৰ কুশল মল্লাৰ দখলত আছিল।
তৃতীয় টি–২০ মেচত বৈভৱে ৪৯ বলত ৮১ ৰানৰ বিস্ফোৰক ইনিংছ খেলে। ইয়াৰ লগে লগে তেওঁ পুৰুষ আন্তঃৰাষ্ট্ৰীয় ক্ৰিকেটত ১৬ বছৰ পূৰ্ণ হোৱাৰ আগতেই দুটা টি–২০ আন্তঃৰাষ্ট্ৰীয় অৰ্ধশতক অৰ্জন কৰা বিশ্বৰ প্ৰথম বেটছমেন হিচাপে পৰিগণিত হয়।
প্ৰথম টি–২০ আন্তঃৰাষ্ট্ৰীয় অৰ্ধশতকৰ জৰিয়তে বৈভৱে ভাৰতৰ হৈ সৰ্বকনিষ্ঠ বয়সত আন্তঃৰাষ্ট্ৰীয় অৰ্ধশতক অৰ্জন কৰাৰ নজিৰ গঢ়ে। ইয়াৰ পূৰ্বে এই অভিলেখ মহান বেটছমেন সচিন তেণ্ডুলকাৰৰ দখলত প্ৰায় ৩৭ বছৰ ধৰি আছিল।
সহযোগী (Associate) দেশৰ কেইবাজনো ক্ৰিকেটাৰে কম বয়সতে ভাল প্ৰদৰ্শন কৰিলেও, আইচিচিৰ পূৰ্ণ সদস্য দেশৰ হৈ খেলি ১৬ বছৰৰ আগতেই একাধিক আন্তঃৰাষ্ট্ৰীয় অৰ্ধশতক অৰ্জন কৰা প্ৰথম ক্ৰিকেটাৰ হিচাপে বৈভৱ সূৰ্যবংশীয়ে নতুন ইতিহাস গঢ়িলে।
তিনিখন মেচত ১৫১ ৰান সংগ্ৰহ কৰি বৈভৱে কেৱল ভাৰতক শৃংখলা জয় কৰোৱাই নহয়, আন্তঃৰাষ্ট্ৰীয় ক্ৰিকেট ইতিহাসৰ সৰ্বকনিষ্ঠ ‘প্লেয়াৰ অৱ দ্য ছিৰিজ’ সন্মানো নিজৰ নামত কৰে। এই কৃতিত্বে তেওঁৰ উজ্জ্বল ভৱিষ্যতৰ স্পষ্ট ইংগিত দিয়ে।
জিম্বাবুৱে ভ্ৰমণ বৈভৱ সূৰ্যবংশীৰ বাবে কেৱল এখন সফল শৃংখলাই নহয়, বৰং ভাৰতীয় ক্ৰিকেটত এক সম্ভাৱনাময় যাত্ৰাৰ আৰম্ভণিও। যি আত্মবিশ্বাস, আক্ৰমণাত্মক বেটিং আৰু ধাৰাবাহিকতাৰে তেওঁ প্ৰদৰ্শন আগবঢ়াইছে, তাৰ পৰা স্পষ্ট যে আগন্তুক বছৰবোৰত তেওঁ ভাৰতীয় ক্ৰিকেটৰ অন্যতম ডাঙৰ তাৰকা হিচাপে আত্মপ্ৰকাশ কৰাৰ সম্পূৰ্ণ সম্ভাৱনা আছে।
ডিজিটেল ডেস্ক, ২৭ জুলাই