বাদুলী লতাৰে প্রস্তুত কৰা ঔষধেৰে ক’ভিড–১৯ নির্মূলৰ দাবী

নিয়মীয়া বাৰ্তা, ২৯ এপ্ৰিলঃ লখিমপুৰ জিলাৰ নাৰায়ণপুৰৰ এজন লোকে প্রস্তুত কৰি উলিয়াইছে ক’ভিড–১৯ নির্মূল কৰিব পৰা এবিধ বনৌষধ ৷  নাৰায়ণপুৰ পৌৰ সভাৰ অন্তর্গত ১ নং ৱার্ডৰ বদুলাআটী নিৱাসী তথা ব্যৱসায়ী অতুল শইকীয়াই প্রস্তুত কৰি উলিয়াইছে উক্ত বনৌষধি৷

তেওঁ জনোৱা মতে, উক্ত বনৌষধে ক’ভিড–১৯ ৰ উপৰি মেলেৰিয়া জ্বৰ, কাহ, মূৰৰ বিষকে ধৰি ডেংগু বেমাৰত আক্রান্ত লোকে খালেও ৰোগমুক্ত হ’ব৷ উল্লেখ্য যে উক্ত ঔষধ পাতলীয়া আহাৰ গ্রহণৰ পিছত খাব লাগে৷

অসমৰ হাবিত সহজলভ্য বাদুলী লতা নামৰ ঔষধি গছৰ শিপা আৰু আলুৰ পৰা প্রস্তুত কৰা হয়৷ উক্ত ঔষধ প্রস্তুত কৰা ব্যক্তিজনে জনোৱা মতে, ১৯৯৭ চনত তেওঁ চেৰিব্রেল মেলেৰিয়াত আক্রান্ত হৈছিল৷ এজন বৃদ্ধ লোকে উক্ত ঔষধ প্রস্তুত কৰি দিয়া ঔষধ সেৱনৰ পিছতে তেওঁ আৰোগ্য লাভ কৰে৷

পৰৱর্তী সময়ত তেওঁ উক্ত ঔষধ উত্তৰ লখিমপুৰৰ আজাদৰ ডেংগুত আক্রান্ত এজন লোকৰ উপৰি বহু ৰোগীক এই ঔষধ দি ৰোগমুক্ত কৰি আহিছে৷  ইতিমধ্যে, তেওঁ ৰাজ্যৰ মুখ্যমন্ত্রীলৈ এখন পত্রসহ উক্ত ঔষধৰ বডি প্রেৰণ কৰি পৰীক্ষাৰ বাবে আহ্বান জনাইছে৷