নিয়মীয়া বাৰ্তা, ২৫ জুলাইঃ গুৱাহাটী মহানগৰীত সক্রিয় হৈ আছে তেলচোৰ চক্র৷ মহানগৰীৰ জালুকবাৰী আৰক্ষীয়ে কালি নিশা অভিযান চলাই তেলচোৰ চক্রৰ এজন লোকক গ্রেপ্তাৰ কৰাৰ লগতে এখন অইল টেংকাৰ আৰু বলেৰ’ বাহন এখন জব্দ কৰে৷ প্রাপ্ত তথ্য মতে জালুকবাৰীস্থিত আকাংক্ষা হাস্পতালৰ সন্মুখত এছ ০১ জি চি ৯৫৩৯ নম্বৰৰ টেংকাৰখনৰ পৰা তেল চুৰি কৰি থাকোঁতেই আৰক্ষীয়ে অতর্কিতে অভিযান চলাই নাৰায়ণ বিশ্বাস নামৰ এজন লোকক গ্রেপ্তাৰ কৰে৷ ধৃত লোকজনৰ ঘৰ কোচবিহাৰত যদিও গুৱাহাটীৰ নুনমাটি এছ বি আই কলনীৰ সমীপত বাস কৰে বুলি জানিব পৰা গৈছে৷
আনহাতে, টেংকাৰখনৰ কাষতে থকা এ এছ ০১ এডি ৭৮৭৮ নম্বৰৰ এখন বলেৰ’ বাহনো আৰক্ষীয়ে জব্দ কৰে৷ বলেৰ’ বাহনখন চুৰি তেল সৰবৰাহ কার্যত ব্যৱহাৰ কৰা বুলি আৰক্ষীয়ে সন্দেহ প্রকাশ কৰিছে৷ আৰক্ষীয়ে অধিক তথ্যৰ বাবে ধৃত নাৰায়ণ বিশ্বাসক জেৰা অব্যাহত ৰাখিছে৷ উল্লেখ্য যে আৰক্ষীৰ চকুত ধূলি দি মহানগৰীৰ বিভিন্ন প্রান্তত তেলচোৰ চক্রই তেলৰ চোৰাং বেহা অব্যাহত ৰখাৰ অভিযোগ উত্থাপন হৈ আহিছে৷ মহানগৰ আৰক্ষীয়ে মাজে–সময়ে তেলচোৰ চক্রৰ বিৰুদ্ধে অভিযান চলাই কেইবাটাও স্থানত চোৰাং তেলৰ ঘাটি উৎখাত কৰে